ने. सं. ११४४ कौलाथ्व पारू - नःलास्वनेगु

लाखे प्याखंयात व्यवस्थित यायेत सहलह

येँ(नेपालभाषा टाइम्स)- येँयाःया इलय् पिहां वइगु मजिपाः लाखे प्याखंयात व्यवस्थित यायेगु ल्याखं छगू सहलह जूगु दु । येँयाःया इलय् पिहां वइगु थीथी द्यः प्याखंमध्ये मजिपाः लाखे नं छगू प्रमुख आकर्षण खः ।

येँयाः इलय् जक पिहां वइम्ह मजिपाः लाखे प्याखं व्यवस्थित व मर्यादित धंगं संचालन यायेत धासें जात्रालिसे सम्बन्धित प्रतिनिधि, सरोकारवाला निकायया प्रतिनिधि, जनप्रतिनिधि व सुरक्षा निकायया प्रतिनिधि दथुइ सहलह याःगु खः ।

लाखे आजु गुथिया संरक्षक दीपक रञ्जितया सभापतित्वय् जूगु ज्याझ्वलय् मूपाहांकथं झायादीम्ह येँ महानगरपालिका २० वडाअध्यक्ष राजेन्द्र मानन्धरं येँया जात्रायात सभ्य रुपं हनेत नगरवासीयात इनाप यानादिसें जात्राय् पिहां वइगु थीथी द्यः प्याखंयात नं व्यवस्थित रुपं प्रदर्शन यायेगु निंतिं सहज वातावरण निर्माण यायेत इनाप यानादिल ।

जनसेवा प्रहरी वृत्तया प्रहरी नायब उपरीक्षक रुकेश तण्डुकारं येँयाःया इलय् श्री कुमारि, श्री गणेश व श्री भैरवलिसें मजिपाः लाखे, हलचोकया श्री आकाश भैरव व किलागःया पुलुकिसि नं नापं नगर परिक्रमा याइगु प्रचलन दया वयाच्वंगु धासें थ्व जात्रा नेवाःया दुने जक सीमित मजुसे नेपाःया हे सांस्कृतिक महत्वं जाःगु नखः आः वयाः विश्वया हे आकर्षण जुइधुंकूगु खँ कनादिल ।

सहलहया इलय् येँयाःज्वःछि जात्रा स्यंकेगु नियतं उच्छृखंल, अवाञ्छित व गुण्डागर्दीइ कुहां वइपिंत नियन्त्रणय् कयाः जात्रा क्वमचाःतले कुना तयेमाःगु धासें सहभागि स्थानीयतसें याःगु इनापयात जनसेवा प्रहरी वृत्तया प्रहरी नायब उपरीक्षक तण्डुकार व कालिमाति प्रहरी वृत्तया प्रहरी नायब उपरीक्षक रुपक खड्कां सकारात्मक रुपं कयादिसें सुरक्षा व्यवस्थायात चुस्त यायेगु प्रतिवद्धता प्वंकादीगु खः ।

लाखे आजु गुथिया प्रवक्ता सुरेन्द्र रंजित ‘सुदामां’ येँ देय्या तःजिगु नखः येँयाःया इलय् पिहां वइगु मजिपाः लाखेयात मेमेगु इलय् थीथी थासय् पिहां वइगु लाखेलिसे तुलना मयायेत इनाप यानादिल । येँयाः इलय् पिहां वइगु मजिपाः लाखे परम्परानिसें जीवित देवीया रुपय् हना वयाच्वंगुलिं मजिपाः लाखेयात मेमेपिं लाखेलिसे तुलना याये मजिउगु वय्कःया धापू दु ।

थुकथं हे मजिपाः लाखे, झ्यालिंचाया किपा (भित्ते चित्र) थीथी थासय् अंगलय् च्वयातःगु खँय् आपत्ति प्वंकुसे लाखे व झ्यालिंचाया किपा उकथं च्वयेगु विषयवस्तु मजूगुलिं उकियात तत्काल चिइकेत नं माग याःगु दु ।
सहलह ज्याझ्वलय् बागमति प्रदेशया पुलांम्ह सांसद राजेश शाक्य, येँयाः (इन्द्रजात्रा) व्यवस्थापन समितिया अध्यक्ष गौतमरत्न शाक्य, श्री हलचोक आकाश भैरवया सागर पुतुवार, येँयाः (इन्द्रजात्रा) व्यवस्थापन समितिया गणपतिलाल श्रेष्ठ, थीथी खलः, पुचः, संघसंस्था, क्लबया प्रतिनिधिपिनिगु उपस्थिति दुगु खः ।