१३ अर्ब जरिवाना
भारतीय संकिपा ख्यःया नायक नायिकां कानुन हाचां गाल धाःसा जरिवाना पूगु समाचार झीसं न्यना वयाच्वनागु खः । तर इमिसं गुलि जरिवाना पुल धइगु बारे धाःसा संचारमाध्यमय् छुं नं न्ह्यथनातःगु दइमखु । तर छम्ह चिनिया अभिनेत्रीं ८८३ मिलियन युआन (चिनिया मुद्रा) अर्थात झिंस्वंगू अर्बतका दां बराबरया जरिवाना पुलेमाःगु जूगु दु ।
कर छले याःगु व थीथी आपराधिक गतिविधिइ संलग्न जूगु द्वपनय् चिनिया अभिनेत्रीयात उकथंया जरिवाना न्यंकूगु खः । फेन बिंगबिंग नांया उम्ह अभिनेत्रीयात उकथंया जरिवाना न्यंकूगु खः । तर बिंगबिंग धाःसा वंगु जुलाइनिसें हे बेपत्ता जुयाच्वंगु खःसा हालय् जक वं सामाजिक संजालपाखें थम्हं यानागु गल्तीयात कयाः ताःहाकःगु हे माफीपत्र सेयर याःगु दु ।
बिंगबिंगया थुगु ज्यां वया प्रशसंक जक मखु सकसितं हे अजू चायेका बिउगु दु । अभिनत्री फेन बिंगबिंग चीनय् दकलय् अप्वः कमाइ दुम्ह छम्ह प्रमुख कलाकार खः । ३० दँ दुम्ह बिंगबिंगं चिनिया फिल्म उद्योगय् जक मखु हलिउडया फिल्म ‘एक्स म्यान’ व ‘आइरन म्यान’ लगायत मेमेगु नं आपालं फिल्मय् अभिनय यायेधुंकूगु दु ।
बेपत्ता जुयाच्वंम्ह बिंगबिंगं सामाजिक संजालपाखें माफी फ्वंसां व गन दु धइगु बारे छुं खुलासा यानातःगु धाःसा मदु । यद्यपि वयात सुनानं नजरबन्दय् तयातःगु दयेमाः धइगु अनुमान धाःसा जुयाच्वंगु दु । इलय् हे जरिवाना वापतया ध्यबा पुला बिउगु खःसा आपराधिक मामिलापाखें बचे जुइम्ह बिंगबिंगं लिपा हे जूसां थमहं कानुनया पलाना यायेगु व थम्हं पुलेमाःगु जरिवाना पुलेगु निंतिं तयार जूगु दु ।
LEAVE YOUR COMMENTS