मनपां लाथेपाथे तयातःगु बोर्ड चीकीगु

येँ – येँ महानगरपालिकां अव्यवस्थित रुपं, नियम अःखः लाक्वपाक्व धंगं तयातःगु होर्डिङ बोर्ड चीकेगु ज्यायात तीव्रता बिउगु दु ।दछि न्ह्यः हे थुकथं लाथेपाथे धंगं तयातःगु होर्डिङ बोर्ड चीकेगु अभियान न्ह्याकूगु खःसां आः वयाः उकथं तयातःगु होर्डिङ बोर्ड चिइकेगु अभियानयात तीव्रता बियाहःगु खः । व्यवसायीक प्रयोजनया ल्याखं तयातःगु अज्याःगु बोर्ड स्वनिगःया सुन्दरता हे कुरुप व वातावरण नं फोहोर खनेदुगु्लिं बोर्ड चीकेगु ज्या न्ह्याकूगु कामपां धाःगु दु ।बोर्ड चिइकेगु नापं आः हाकनं सुनानं अज्याःगु ज्या याःगु प्रमाण लुत धाःसा कानुनी रुपं कारवाही यायेगु खँ कामपाया निर्देशक नवराज ढकालं कनादीगु दु ।नियम संगत तयातःगु बाहेक फुक्क कथंया होर्डिङ बोर्ड चीकेगु मनपाया राजश्व विभाग प्रमुख राज्यप्रकाश प्रधानांगं धयादीगु दु । वय्कलं धयादी, होर्डिङ बोर्ड तइगु व्यक्ति वा संस्थायात कारबाही यायेगु जुइ, गुगुं नं बहानाय् आः छुट बीगु अवस्था मदु ।’वय्कलं स्वीकृति बियागु स्वयां नं विज्ञापन व बोर्ड अप्वःगुलिं महानगरं विशेष रुपय् निगरानी तयेगु ज्या न्ह्याकूगु खँ नं कनादीगु दु । न्हापांगु चरणय् विज्ञापन व होर्डिङ व्यवस्थित यायेगु निंतिं बोर्ड वांछ्वयेगु व एजेन्सी सम्पर्कय् मवल धाःसा कम्पनीयाके हे उगु बोर्ड लिकायेगु निंतिं तूगु खर्चया लिसें जरिवाना यायेगु खँ नं वय्कलं धयादीगु दु ।