ने. सं. ११४४ कौलाथ्व दशमी - स्याक्वत्याक्व

न्हूदँ समारोह समितियात प्रमया बचं ‘माइन्युटय् ने.सं. तये’

येँ (नेपालभाषा टाइम्स)- प्रधानमन्त्री पुष्पकमल दाहालं मन्त्रिपरिषद्या बैठक च्वनीबलय् उकिया माइन्युटय् नेपाल संवत् नं छ्यलेगु लागिं थम्हं कुतः यायेगु खँ धयादीगु दु ।

नेपाल संवत न्हूदँ राष्ट्रिय समारोह समिति ११४४ पाखें म्हिगः प्रधानमन्त्री दाहालयात नापलानाः न्हूदँया लसताय् कछलाथ्व पारु (कार्तिक २८ गते) कुन्हु बसन्तपुलिइ जुइगु भिंतुना सभाया ज्याझ्वलय् मूपाहां कथं झायेत ब्वनापौ बिउ वःपिं समारोह समितिया दुजःपिंलिसे खँ ल्हासें वय्कलं उगु खँ धयादीगु खः ।

समारोह समितिया नायः प्रा.डा. नरेशमान बज्राचार्यं नेपाल संवतया आन्दोलनपाखें याःगु आपालं माग थीथी प्रधानमन्त्री जूपिनिगु पालय् पूवंकेगु ज्या जुयाच्वंगु खँ कनादिसें न्हूदँ ११४४ निसें नेपाल सरकारया मन्त्रिपरिषद्या बैठक च्वनीबलय् उकिया निर्णय पुस्तिका (माइन्युट) य् नेपाल संवत नं उल्लेख यानाः थुगु संवतयात सम्मान यायेत इनाप यानादीगु खः । वय्कःयात लिसः बिसें प्रम दाहालं थुकिया लागिं थम्हं कर्मचारीतय्के न्यनेकने यानाः माइन्युटय् नेपाल संवत् च्वकेगु ज्या याये धकाः आश्वासन बियादीगु खः । लिसें वय्कलं थ्व खँ यदि मिले जुइगु जुल धाःसा बसन्तपुलिइ जुइगु सभाय् हे थम्हं थ्व खँ घोषणा यायेगु जुइ धकाः नं धयादिल ।

उगु इलय् प्रम दाहालं नेपाःया मौलिक संवत् नेपाल संवत हे खः धासें विक्रम संवत बरु विदेशं आयातित संवत जूगु बिचाः नं प्वंकादीगु दु । वय्कलं नेपाल संवत नेपाः देय्या संवत जूगुलिं थःपिंसं थुगु संवतयात नेपाःया राष्ट्रिय संवतया मान्यता बियाः घोषणा यानागु खँ नं अन लुमंकादिल ।

अथेहे, तत्कालीन संस्कृतिमन्त्री जीवनराम श्रेष्ठं शंखधरया नामं सरकारपाखें हे सिरपाः पलिस्था यानाः बीगु धकाः तयारी यानातःगु ‘शंखधर सिरपाः’ लःल्हायेगु ज्या कार्यान्वयन यायेत नं समारोह समितिं इनाप याःगु खः । प्रम दाहालं उगु इनापयात नं स्वीकार यासें न्हूदँया सभाय् सम्भवतः थ्व सिरपाः नं घोषणा यायेगु बचं बियादिल ।
न्हूदँया लसताय् येँया बसन्तपुलिइ जुइगु न्हूदँया मू समारोहय् प्रधानमन्त्री हे मूपाहां कथं सहभागी जुइगु चलन जुया वयाच्वंगु दु ।

समारोह समितिया नायः प्रा.डा. बज्राचार्यया नेतृत्वय् वंगु उगु पुचलय् पूर्व रक्षामन्त्री भीमसेनदास प्रधान, पूर्व स्थानीय विकास व प्रशासनमन्त्री राजेन्द्र श्रेष्ठ, पूर्व महान्यायाधिवक्ता मुक्ति प्रधानलिसें नेवाः देय् दबूया नायः पवित्र बज्राचार्य व समारोह समितिया सचिवालय दुजःपिं नं दुथ्याःगु खः । न्हूदँ ११४४ तःजिक हनेगु लागिं न्हूदँ समारोह समितिं थीथी तयारीया ज्या यानाच्वंगु दु ।