नेपालगञ्जय् न्हापांखुसी सायाः पिथन

येँ – नेपालगञ्जय् थुगुसी न्हापांखुसी सायाः पिथंगु दु । नेपालगञ्जय् च्वंपिं नेवाःतय्सं थः मदुपिं छेँजःपिनि लुमन्ती मंकाः कथं सायाः पिथँगु खः । नेवाः पुचः बाँके व नेवाः देय् दबू बाँकेया ग्वसालय् भाय्, संस्कृति व परम्पराया संरक्षण याये धयागु नारा बियाः सायाः पिथँगु खः ।

थ्वयां न्ह्यः नेपालगञ्जय् च्वनाच्वंपिं नेवाःतय् थः छेँजः मंत धायेवं अनया बागेश्वरी द्यःयाथाय् पुजा वनाः सापारु हनेगु याना वयाच्वंगु खः ।

थुगुसी पिथँगु मंकाः सायाः थीथी बाजंसहित नेपालगञ्जया धम्बोझीचोकं सुरु यानाः सेत विक चोक, त्रिवेणी मोड, घरबारी टोल चाःहिलाः बागेश्वरी द्यःयाथाय् थ्यंकाः क्वचायेकूगु खः । सायाः पिकाःबलय् येँय् थें मस्तय्त सा, गोसाइँचा दयेकाः, ख्वपय् थें तायाःमचाः दयेकाः लिसें कृष्ण, हनुमानया रुपय् पितहःगु खःसा थ्व दछिया दुने मदुपिनि तस्वीर ज्वनाः वःगु खः ।

नेवाः पुचः बाँकेया दुजः कृष्णप्रसाद श्रेष्ठं सायाःयात छगू जाती विशेषया जक नखः कथं महँसें सकस्यां हनेफइगु पर्व कथं विकास यायेगु खँ स्थानीय पत्रकारतय्त धयादीगु दु ।