पार्टीतय्त चुनावया फसं कल
येँ (नेपालभाषा टाइम्स)÷मंसिर ४ गते जुइगु चुनाव न्ह्यःने थ्यंकः वःलिसे राजनीतिक पार्टीतय्गु गतिविधि नं आकाझाकां अप्वया वःगु दु । थ्व झ्वलय् थौंकन्हय् विशेष यानाः माओवादी केन्द्रया अध्यक्ष पुष्पकमल दाहालया छेँ खुमलटारय् अप्वः जमघट जुयाच्वंगु खँ सीदुगु दु ।
वय्कःयाथाय् म्हीग तिनि पुलांम्ह पासा डा. बाबुराम भट्टराई वनाः खँल्हाबल्हा यानादीगु खःसा म्हिगः नं डा. भट्टराई सुथ न्हापां हे वय्कःया छेँय् थ्यंगु खः । म्हिगःया वार्ताय् वर्षमान पुन व जनार्दन शर्मा समेत नापं च्वनाः खँल्हाबल्हा याःगु खः ।
चुनावय् सत्ता गठबन्धनपाखें नापं मिले जुयाः चुनाव ल्वायेगु धकाः तयारी यानाच्वंगु जुयाः हे तयारी यायेगु लागिं दाहालया छेँय् निरन्तर जमघट जुयाच्वंगु खँ धाःगु दु ।
थ्वहे झ्वलय् मेखे नेकपा (एमालें) चुनावयात ध्यानय् तयाः तालिमया ज्याझ्वः न्ह्याकूग दु । म्हिगःनिसें येँय् पार्टीया थीथी कमिटीया कार्यकर्तातय्त थ्व तालिम बीगु शुरु याःगु दु । थुकी पार्टीया येँया विशेष नेता कार्यकर्तातय्गु उपस्थिति दुगु खँ सीदुगु दु ।
चुनाव न्ह्यःने थ्यंलिसे थीथी पार्टी दुने उम्मेदवार जुइपिनि बारे नं थीथी कथंया चर्चा शुरु जूगु दु । थुकिया लागिं टिकटया प्रत्याशी कार्यकर्तातय्सं थाय्थासय् धाःवनेगु व माःथाय् स्वापू तः वनेगु ज्या नं शुरु यायेधुंकूगु दु ।
थ्व चुनावय् सत्ता गठबन्धनपाखें मिले जुयाःचुनाव ल्वायेगु धकाः तयारी याःसां सिटया बाँडफाँडय् धाःसा समस्या जुयाच्वंगु खँ सीदुगु दु । थुगुृसी एमालेया उम्मेदवारत बुइ धइगु अनुमान जूगुलिं नं सत्ता गठबन्धनया कार्यकर्तातय्के अप्वः उत्साह पिहां वयाच्वंगु खँ धाःगु दु ।
LEAVE YOUR COMMENTS