नेपाः–चीन रेलमार्ग ,संसारया हे जटिलतम लँपु

येँ – चीनं नेपाः दुहां वइगु रेलमार्ग संसारया हे छगू अतिकं जटिल प्रकृतिया रेल जुइगु खँ धाःगु दु । थुकिया बारे नकतिनि चीनय् जूगु सहलह ज्याझ्वलय् ब्वति कयाः लिहां वःगु नेपाःया प्रतिनिधि मण्डलय् दुथ्याःपिं दुजःतय्सं धाः कथं नेपाः–चीन रेलमार्ग तसकं जटिल खःसां चीनं उकियात उच्चस्तरया प्रविधि छ्यलाः जूसां पूवंकेगु प्रतिवद्धता प्वंकूगु दु ।

थुकिया लागिं छु छु प्रविधि प्रयोग याःसा जी धकाः चीनं तयारी यायेधुंकूगु दु । थ्व ल्याखं थुगु रेलमार्ग तसकं जटिल हे खःसां आः केवल प्राविधिक हे जक कारणं रेलमार्ग बने जुइ मखुला धइगु चिन्ता धाःसा समाधान जूगु खँ उगु पुचःया दुजःतय्सं धाःगु दु । अथे खःसां थ्व रेलमार्ग विश्वया हे दकलय् जटिलतम रेगमार्ग मध्ये छगू जुइफुगु खँ भ्रमण पुचलय् दुथ्याःपिं दुजःतय्सं धाःगु दु ।

थ्व रेलमार्ग दयेकीबलय् थुकिया अप्वः धइथें ज्या सुरुङ दुने हे जक जुइ । थ्व रेल मार्ग जुयाः चीनं नेपाः दुहां वयेगु दुरी करिब १०० किलोमिटर जक दइगु खःसां थुकिया ७५ किलोमिटर लँया संरचना तसकं जटिल जुइगु खँ धाःगु दु । थ्व रेलमार्गया लागिं ७ गू धइथें सुरुङ मार्ग दयेकेमाःगु आवश्यकता दु ।

थ्व ७ गू मध्ये छगू १९ किलोमिटर ताःहाकः जुइसा मेगु १७ किलोमिटर ताःहाकः जुइ । थ्व सुरुङ पहाडी लागां करिब २००० मिटर क्वय् निर्माण जुइ । थ्वहे लँ छखे अतिकं उच्च हिमाली लागाय् लाइसा मेखे जमिनं २००० मिटर थ्यंक दुने नं लाइ । जमिनं पिने लाइगु मार्गय् नं छपु ताँ अज्याःगु नं दइ गुगु ३ किलोमिटर ताःहाकः जुइ ।

छपु हे मार्गय् थुलि विविधतापूर्ण जटिलतां जाःगु अवस्था मेगु लँय् मदु हे धाःसां जिउगु खँ धाःसां दु । थ्व ल्याखं थुकियात विश्वया हे जटिलतम लँपु मध्ये छपु धाये मालीगु खँ धाःगु दु । थ्व रेलमार्ग नेपाःया लाङटाङ राष्ट्रिय निकुञ्ज दुने नं दुहां वनीगु कथं डिजायन जुयाच्वंगु दु ।

राष्ट्रिय निकुञ्जय् दुहां वन धाःसा अनया पर्यावरणय् थुकिं तःधंगु लिच्वः लाके फइगु बारे धाःसा आः तक बिचाः मयाःनिगु खँ धाःगु दु ।
थ्व लँ दयेकेगु लागिं नेपाःपाखेया ७२ किलोमिटर अतिकं शुक्ष्म ढंगं अध्ययन याये माःगु आवश्यकता दु । उकिया नापनापं चीनपाखे करिब ५०० किलोमिटर लँया बारे नं उकथं हे अध्ययन याये मानिगु जुयाः लँ दयेकेगु ज्यां अझ हे ई कायेफुगु खँ धाःगु दु ।

आः तक लँया प्राविधिक पक्षया बारे जक खँ जूगु दुसा आः वइगु नोभेम्बर महिनाय् चीनय् जुइगु मेगु छगू बैठकय् थुकिया लागत बारे नं खँ जुइगु सीदुगु दु । थुकिया खर्च सुनां याइ धइगु निश्चित मजूनि ।