ओली–प्रचण्ड दथुइ सहमति, पालंपाः सरकारया नेतृत्व, पार्टीइ मंकाः नेतृत्व
कार्यदलया बैठक थौं बहनी ७ बजे, हस्ताक्षर थौं हे जुइफु
येँ – एमाले व माओवादी एकताया निंतिं थौं जूगु प्रधानमन्त्री व एमाले अध्यक्ष केपी ओली व माओवादी अध्यक्ष प्रचण्ड दथुइया वार्ता पालंपाः प्रधानमन्त्री जुइगु सहमति जूगु दु । अथेहे पार्टीया नेतृत्व नं मंकाः कथं यायेगु सहमति जूगु खँ धाःगु दु । एकताया समस्या पिकयाच्वंगु एमालेया जबज सिद्धान्त व माओवादीया माओवाद बारे नं निम्ह नेतातय् सहमति जूगु दु ।
निम्ह नेतां थौं पार्टी एकताया खाका दयेकूगु दुसा आः थुकियात एकता संयोजन कार्यदलपाखें अनुमान याकेत्यंगु दु । थुकिया निंतिं थौं बहनी ७ बजे कार्यदलया बैठक च्वनेत्यंगु दु ।
माओवादी केन्द्रया नेता जनार्दन शर्मां कार्यदलया बैठकं उगु खाका पारित याइगु खँ धयादीगु दु । वय्कलं ओली व प्रचण्ड दथुइ पार्टी एकताया नितिं खाकाय् सहमति जुइधुंकूगु खँ धयादीगु दु ।
पालंपाः प्रधानमन्त्रीइ सहमति जूसां थुकियात लिखित रुपं धाःसा मतइगु खँ धाःगु दु ।
नेता शर्मां आः केपी ओलीं सरकारया नेतृत्व यायेधुंकूगु व एकता लिपा छगू हे पार्टी जुइधुंकीगुलिं समझदारी कथं पाःपाः जुइफु धयादीगु दु । सहमति कथं पार्टीया नां नेपाल कम्युनिष्ट पार्टी जुइ । निम्हं नेतात अध्यक्षया हैसियतय् दइ, अले पालंपाः बैठकय् अध्यक्षता याइ ।
अथेहे निगू दलं बिस्कं बिस्कं नालाच्वंगु जबज व माओवाद बारे एकता महाधिवेशन तक सहलह ब्याका वनेगु सहमति जूगु खः ।
नेता शर्मां धयादीगु दु, ‘माओवादं नेपाली क्रान्ति व हिउपाःया निंतिं याःगु योगदान व बहुदलीय जनतावादं म्हितूगु भूमिका बारे स हलह यानाः निष्कर्षय् वनेगु व न्हू ढंगं विकसित यायेगु सहमति जूगु दु ।’
LEAVE YOUR COMMENTS