अष्टलक्ष्मी शाक्य बागमति प्रदेशया मुख्यमन्त्री नियुक्त

येँ – एमाले उपाध्यक्ष अष्टलक्ष्मी शाक्य बागमति प्रदेशया मुख्यमन्त्री जुयादीगु दु । एमाले पार्टी विभाजन जुइगु जुइवं माधव नेपाल पक्षया शाक्यात केपी ओलीं मुख्यमन्त्री दयेकूगु खः । थुकिया निंतिं ओली लिसे सतीम्ह डोमरणी पौडेलं मुख्यमन्त्री व एमाले संसदीय दलया नेता पाखें राजीनामा बियादीगु खः ।

पौडेलं राजीनामा बिइवं शाक्ययात तुरुन्त हे संसदीय दलया नेताय् निर्वाचित यासें बागमति प्रदेश मुख्यमन्त्री दयेकूगु खः । वय्कलं स्वम्ह दुजः दुजः मन्त्रिपरिषद् नं दयेकादीधुंकूगु दु । न्हूगु मन्त्रिमण्डलय् कृष्ण खनालयात सामाजिक विकास व भौतिक पूर्वाधार यानाः निगू मन्त्रालय व केशवराज पाण्डेयात आन्तरिम मामिला व कानुन मन्त्रालयया जिम्मा बिउगु दु ।

एमालेया गुक्वःगु महाधिवेशनं हे उपाध्यक्षय् निर्वाचित जूम्ह शाक्यं निर्वाचनया इलय् मुख्यमन्त्री जुइगु शर्तय् केन्द्रय् मदंसे प्रदेशय् उम्मेदवारी बियादीगु खः । तर ओलीं वय्कःयात मुख्यमन्त्री मदयेकुसे थः लिसे सतीम्ह पौडेलयात मुख्यमन्त्री दयेकूगु खः । उबलय् निसें वय्कः ओली विरुद्ध न्ह्यानाच्वनादीम्ह खः । उबलय् हे वय्कलं राष्ट्रपति विद्यादेवी भण्डारीं हे थःत मुख्यमन्त्री मदयेकेत चलखेल याःगु द्वपं बियादीगु खः ।

आः नेपाली पार्टी तछ्यानाः एमाले समाजवादी पार्टी चायेकेवं ओली पक्षं वय्कःयात ह्ययेकेत मुख्यमन्त्री पद बिउगु खः । राजीनामा बियादीम्ह मुख्यमन्त्री पौडेलं नं पार्टी एकता पक्षय् दृढ जुयादीगुलिं शाक्ययात पुरस्कार कथं मुख्यमन्त्री पद बिउगु खँ धयादीगु दु ।