नेपाःयात कयाः जुही चावलाया टि्वट विवादय्

बलिउड अभिनेत्री जुही चावला वंगु छुं दिं न्ह्यःनिसें नेपालय् च्वनाच्वंगु दु । मेमेपिं बलिउड नायक–नायिका विदा माने यायेत अमेरिका, स्वीट्जरल्याड, सिंगापुर, हङकङ, बैंकक, श्रीलंका, मालदिभ्स लगायतया देशय् वनी । तर जुही चावलां थ्व क्रमयात भंग यानाः नेपाःयात थःगु गन्तव्य दयेकल ।

स्वनिगलय् चाःहिलेगु झ्वलय् अभिनेत्री जुही ख्वप, धौख्यः, खास्थि आदि आपालं सम्पदास्थल चाःहिउगु खः । छवाः स्वयां अप्वः येँ च्वनाः लिहां वनेत्यंगु इलय् जुहीं याःगु छगू टिप्पणी धाःसा विवादय् लाःगु दु । थःगु येँय् भ्रमण अवधिइ थीथी देगः व सम्पदास्थल चाःहिलाः उकिया किपा तकं सामाजिक संजलय् सेयर याःम्ह जुहीं थः लिहां वनेत्यंगु इलय् स्वनिगःया खराब चित्रण यायेवं उकियात कयाः विवाद ब्वलंगु खः ।

जुहीं थः लिहां वनेत्ययेकाः छपाः किपा पोस्ट याःगु दु । गुकी जुहीलिसें मेपिं प्यम्ह मिसां रुमालं थःगु न्हाय् त्वपुयाच्वंगु दु । उगु किपाया क्याप्सनय् जुहीं च्वःगु दु, ‘येँय् जिपिं थःगु कारयात पियाच्वनागु इलय् …… तसकं धुफ्वः दनाच्वंगु, ट्राफिक जाम नं उत्तिकं दुगु, फसय् आपालं मात्राय् डिजेल व पेट्रोलया कुं जायाच्वंगु ….. गुकिया कारणं जिमिसं थःगु ख्वाः त्वपुइत बाध्य जुल । थन न्हियान्हिथं स्थानीयवासीत थःगु ख्वालय् चिकित्सकीय मास्क तयाः वनेगु याइ ।’

जुहीं सामाजिक संजाल ‘ट्विटर’य् याःगु थुकथंया टिप्पणीयात नेपाःमितय्सं ययेकाच्वंगु मदुसा इमिसं येँया मखु थःगु देय्या राजधनीया प्रदूषणया बारे चिउताः कायेत नं सुझाव बिउगु दु ।