‘लिम्पियाधुरा’ या पाठ्यसफुली रोक

येँ (नेपालभाषा टाइम्स) – प्रधानमन्त्री केपी शर्मा ओलीं लिम्पियाधुरा समेत दुथ्याःगु नक्सा तयाः छापे यानातःगु पाठ्यपुस्तक आःयात बजारय् इने मतेनि धकाः पना बिउगु दु। पाठ्यक्रम विकास केन्द्रं ‘नेपालको भूभाग र सीमासम्बन्धी स्वाध्याय सामग्री’ नां तयाः उगु सफू छापे याःगु खः । वंगु विहीवाः च्वंगु मन्त्रिपरिषद् बैठकय् प्रम ओलीं उगु निर्देशन बियादीगु खः ।

केन्द्रं विज्ञ व सरोकारवालायात लक्षित यानाः न्यासःपाः सफू छापे याःगु खः । सफुली नेपाःया मुक्कं क्षेत्रफल १,४७,६४१.२८ वर्ग किलोमिटर धकाः न्ह्यथनातःगु दु। उकी नाबी, कुटी, गुञ्जी लगायत लिम्पियाधुरा दुथ्याः । प्रधानमन्त्री ओलीया थ्व निर्देशन लिपा थीथी आशंका ब्वलंगु दु। थम्हं हे नक्सा बारे निर्णय यायेगु व उकियात कयाः पाठ्यक्रम तयार यायेधुंकाः चाहिँ उकियात पनेगु वय्कःया ज्या खनाः विज्ञत अजूचाःगु दु ।

पाठ्यपुस्तक विभागया अधिकारीतय्सं प्रमया उगु निर्देशन गलत जूगु खँ धाःगु दु। निशान छाप व सरकारी लोगोय् लिम्पियाधुरा सहितया नक्सा तयेजिउ तर उगु हे नक्सा कथं सफू छापे यायेमजिउगु छाय् धकाः न्ह्यसः नं तयाहःगु दु ।

थ्वहे झ्वलय् परराष्ट्र व भूमि व्यवस्था मन्त्रालयया अधिकारीतय्सं नं उगु सफूया विरोध यानाच्वंगु खँ सीदुगु दु। नक्साय् थपे जूगु भूभाग लित हये फइ मफइ धइगु खँ क्वःमजीकं सफुली दुथ्याकेबलय् विद्यार्थीयात गतल सन्देश वनीगु खँ उमिसं धाःगु दु। प्रम ओलीं उगु सफू प्रकाशन मयायेत बिउगु निर्देशनया मू कारण सफू प्रकाशन लिपा भारत तंचाइ धकाः जुइमाः धकाः नं थन धयाहःगु दु ।