उम्मेदवारं राजीनामा बीमाःगु जुल

येँ – जनप्रतिनिधिं राजीनामा बियाः जक उम्मेदवार जुइ दइगु निर्वाचन आचार संहिता विरुद्ध लाःगु रिट खारेज जूगु दु । सिन्धुपाल्चोक हेलम्बु गाउँपालिकाया अध्यक्ष निमा ग्याल्जेन शेर्पां आयोगया प्रावधान विरुद्ध रिट दायर याःगु खःसा सर्वोच्च अदालतं उगु रिट खारेज याना बिउगु खः ।

रिट खारेज जूगुलिं आः उम्मेदवार जुइपिं बहालवाला जनप्रतिनिधितय्सं पदं राजीनामा बीमाःगु जूगु दु ।

म्हिगः न्यायाधीशपिं तेजबहादुर केसी व तिलप्रसाद श्रेष्ठया मंकाः इजलासं स्थानीय तहया चुनावय् उम्मेदवार जुइम्ह जनप्रतिनिधिं राजीनामा बीमाः धकाः आयोगं दयेकूगु प्रावधानयात सदर याना बिउगु खः ।

निर्वाचन आयोगं स्थानीय निर्वाचनय् सरकारी कोषं पारिश्रमिक लिसें आर्थिक सुविधा काइम्ह व्यक्तिं लाभया पद धारण मयाना धकाः स्वघोषणा यासें स्थानीय तहया बहालवाला जनप्रतिनिधिं राजीनामा बीमाःगु बाध्यकारी आचार संहिता लागू याःगु खः ।

आयोगं थुगुसी २०७४ सालय् हे कार्यान्वयन याःगु नियमावलीया प्रावधान कथं सार्वजनिक पद धारण याःम्ह व्यक्तिं उम्मेदवार जुइ मदइ कथं स्वघोषणाया व्यवस्थायात कार्यान्वयनय् हःगु खः ।