ख्वपया निम्ह पुलांपिं पत्रकारयात सम्मान

ख्वप- थनया निम्ह पुलांपिं पत्रकारतय्त छगू ज्याझ्वःया दथुइ सम्मान याःगु दु । स्वतन्त्र पत्रकार संघ ख्वपपाखें वंगु सोमवाः छगू ज्याझ्वःया दथुइ थनया पुलांपिं पत्रकारतय्त सम्मान याःगु ख ः।

संघपाखें ख्वपया निम्ह पुलांपिं पत्रकार इन्दुल केसी व कृष्ण प्रजापतियात सम्मान याःगु खः । वय्कःपिंत संघया केन्द्रीय वरिष्ठ उपाध्यक्ष केबी सम्राटं सम्मानपत्र लःल्हानादीगु खःसा ख्वप कचाया नायः कृष्णराम किसीं खादा क्वखायेका दीगु खः ।

सम्मानित पत्रकार केसी. २०१५ सालनिसें पत्रकारिता ख्यलय् सक्रिय जुयाच्वनादीम्ह खः । केसी उगु इलंनिसें हे तत्कालीन नेपाल संवाद समिति (थौंकन्हय्या राष्ट्रिय समाचार समिति)इ आवद्ध जुयाः पत्रकारिता यानादीम्ह खः ।

अथे हे मेम्ह सम्मानित पत्रकार प्रजापति नं निगू दशक न्ह्यवंनिसें आतक नं पत्रकारिता ख्यलय् निरन्तर रुपं क्रियाशील जुयाच्वनादीगु दु । प्रजापति विशेष यानाः नेपालभाषा पत्रकारिता ख्यलय् सक्रिय जुयाच्वनादीगु दु ।

संघया ख्वप कचाया नायः किसीया सभापतित्वय् जूगु ज्याझ्वलय् मूपाहां सम्राटलिसें सम्मानित पत्रकारद्वयलिसें डा. राजेन्द्र कोजू, सिमान्त शिल्पकार, राष्ट्रिय मानवअधिकार प्रतिष्ठान ख्वपया नयाः शिवहरि खनाल लगायतं थःथःगु नुगःखँ तयादीगु खः । सम्मानित पत्रकारद्वय संघया ख्वप शाखाया संस्थापक अध्यक्ष व उपाध्यक्ष खः ।