भूमि अतिक्रमण विरुद्ध नेवाः मुक्ति मोर्चाया विरोध प्रदर्शन

येँ – स्वनिगः दुने विकासया नामय् जुयाच्वंगु भूमि अतिक्रमणविरुद्ध शुक्रवाः येँय् छगू विरोध प्रदर्शन जुल । नेवाः राष्ट्रिय मुक्ति मोर्चा, येँया ग्वसालय् जूगु उगु विरोध प्रदर्शन ज्याझ्वलय् स्वनिगः दुने लागाया सरोकारवाला व स्थानीयतय्गु सहभागिता दुगु खः ।येँया असनं सुरु जूगु उगु विरोध प्रदर्शन ¥याली त्यःर, ज्याथा, थँबही, छायादेवी कम्प्लेक्स, भगवानबहाः, छत्रपाटी, न्यत, किलागः, भ्याःचाद्यः जुयाः वंघलय् थ्यंकाः कोणसभा याःगु खः ।

उगु कोणसभाय् मुक्ति मोर्चाया केन्द्रीय दुजः पवनमान श्रेष्ठं विकासया नामय् स्वनिगःया भूमि दोहन जुयाच्वंगु व थुकिं विकास मखु थनया सम्पदा, संस्कृतिया विनाश जुयाच्वंगु खँ न्ह्यथनादिल । वय्कलं भूमि अतिक्रमण विरुद्ध आः वइगु दिनय् तःधंगु कडा संघर्षया ज्याझ्वः हयेगु ख्याच्वः बिसें धयादिल – ‘सरकारया प्राथमिकताय् लाःगु बाहिरी चक्रपथ निर्माण जुल धाःसा ३ लाख रोपनी खेतीयोग्य बुँ अतिक्रम जुइ, गुकी स्वनिगःया आदिवासी नेवाः समुदायया लाइ ।’

अथे हे उगु कोण सभाय् नेवाः न्ह्यलुवा डा. महेशमान श्रेष्ठं स्वनिगलय् आः जुयाच्वंगु गतिविधि उपत्यकावासी नेवाःतय् विरुद्ध जुयाच्वंगु खँ न्ह्यथनादिल । वय्कलं विकासया नामय् स्थानीयवासीपिं पीडित जुइ मालाच्वंगुलिं थज्याःगु ज्या याकनं हे दिकेत सरकारयात माग यानादिल ।

अथे हे कोणसभाय् मोर्चाया जिल्ला अध्यक्ष नमस्ते साय्मिं बाहिरी चक्रपथ, स्मार्ट सिटी, फास्ट ट्राय्क, सुख्खा बन्दरगाह निर्माण तथा सतक विस्तारया नामय् स्वनिगःया नेवाःतय् आदिभूमि, ऐतिहासिक, धार्मिक तथा सांस्कृतिक सम्पदा लगायत कला संस्कृति पिलुइगु मठ मन्दिर न्हंका छ्वयाच्वंगुलिं नं सरकारयात दबाब बीत थुगु विरोध प्रदर्शन यायेमाःगु खँ कनादिल ।

वय्कलं थँबहीया छायाँदेवी कम्प्लेक्स नं सार्वजनिक महत्वं जाःगु कमल पुखुलिइ गैरकानुनी रुपय् अतिक्रमण यानाः दयेकूगुलिं उकिया नं विरोध यानादिल ।