येँ महानगरपालिकापाखें थीथी कर छुट

येँ (नेपालभाषा टाइम्स) – येँ महानगरपालिकां कोरोना भाइरसया ग्याःचिकुं अर्थतन्त्रय् हे प्रभाव लाकूगुलिं थीथी ख्यलय् कर छुट बीगु जूगु दु। येँ मनपाया राजश्व विभागं म्हिगः छगू सुचं पितबिसें चालु आर्थिक दँया पौष मसान्त तक सम्पत्ति करय् १० प्रतिशत, होटल वा रिसोर्टया नामय् दर्ता जुयाः संचालन जुयाच्वंगु सम्पत्तिइ पौष मसान्त तक ८५ प्रतिशत व माघ लिपा असार मसान्त तक ७५ प्रतिशत कर छुट बीगु खँ धाःगु दु ।

अथेहे वंगु आर्थिक दँयात व्यवसाय करया आधार माने यायेगु व थ्व स्वयां पुलांगु आर्थिक दँया कर बक्यौता व जरिवाना शतप्रतिशत छुट बीगु खँ धाःगु दु। चालु आर्थिक दँय् लगे जुइगु व्यवसाय करय् आर्थिक ऐन, २०७७ या (ब) खण्डय् न्ह्यथनातःगु होटल, पर्यटन व मनोरञ्जन क्षेत्रलिसे सम्बन्धित व्यवसाय करय् ५० प्रशिशत व मेमेगु व्यवसायय् २० प्रतिशत कर छुट बीगु खँ नं विभागं धाःगु दु ।

अथेहे आर्थिक दँ २०७२-७३ यात बहाल करया आधार दँ माने यानाः थ्व स्वयां पुलांगु आर्थिक दँया बहाल कर, बक्यौता व जरिवाना नं शतप्रतिशत छुट बीगु व सरकारं लकडाउन याःगु अवधीइ घरधनीं लछिया बहाः छुट बियागु स्वःघोषणा यात धाःसा चालु आर्थिक दँय् बहाल करय् नं १० प्रतिशत छुट बीगु जूगु दु। सरकारं याःगु लकडाउन अवधिभरया वंगु आर्थिक दँया फुक्कं कर बक्यौताय् लगे जुइगु जरिवाना नं मकायेगु खँ धाःगु दु ।