येँ महानगरं थप दमकल न्याइगु

येँ – येँ महानगरपालिकाया मेयर विद्यासुन्दर शाक्यं मनपां याकनं हे न्हूगु अत्याधुनिक दमकल न्याइगु खँ धयादीगु दु । येँ महानगरया विपद् जोखिम न्यूनिकरण व व्यवस्थापन या कानुनी प्रावधान सम्बन्धी जूगु अन्तक्र्रियाय् मेयर शाक्य मनपां याकनं हे थप दमकल न्यायेगु तयारी यानाच्वंगु खँ धयादीगु खः । येँ मनपां आः चले याना वयाच्वंगु दमकल तसकं म्हो जूगु तर तांन्वःगु अप्वया वःलिसे मि नइगु घटना नं अप्वइगु जूगुलिं याकनं हे दमकल न्यायेगु तयारी जुयाच्वंगु खँ वय्कलं धयादीगु खः ।

येँ महानगपालिकायाके थौंकन्हय् प्यंगः दमकल दुसा थुकी नं छगः स्यनाः थन्के यानातःगु दु । महानगरपालिकां थौंकन्हय् आइसेट नेपाललिसे जानाः वडा नं. १०, १२ व ३१ य् सुरक्षित सहर परियोजना संचालन यानाच्वंगु दु । अथेहे जोखिम नक्सांकन यायेगु ज्या नं यानाच्वंगु दु । थुकिं पहिचान याःगु थासय् क्षति म्हो यायेत समुदाययात तत्पर यायेगु व उमित आवश्यक स्रोतसाधन बीगु ज्या जुइगु खँ धाःगु दु ।