नेवाः हाइकु सहलह

येँ- नेवाः हाइकु ख्यः (सामाजिक संजाल पुचः)या ग्वसालय् वंगु शनिवाः स्वक्वःगु संस्करणया नेवाः हाइकु सहलह ज्याझ्वःलिसें हाइकु स्वलापौ ‘सवाः’या पितब्वज्या जुल ।

ज्याझ्वलय् मूपाहांकथं झायादीम्ह डा. आनन्द जोशीं हाइकु विधाया थीथी पक्षयात कयाः दुग्यंक कुलादीगु खः । वय्कलं हाइकु च्वयेबलय् अन्तर्राष्ट्रिय मान्यताकथं स्वझ्वःया जुइमाःगु व उकी न्यागः न्हय्गः न्यागः आखःया सिद्धान्तयात पालना जुइमाःगु खँय् बः बियादिल । लिसें वय्कलं हाइकु च्वयेबलय् विम्बया प्रतित जुइमाः धयादिसें हाइकुयात प्रकतिलिसे जक स्वाकाः सीमित घेरा दुने च्वयेगु मखसे मेमेगु विषयवस्तुयात नं थाय् बिया वनेमाः धयादिल ।

हाइकु ख्यःपाखें प्रत्येक वालय् बीगु छपाः किपाया लिधंसाय् च्वयातःगु हाइकुमध्ये उत्कृष्ट ठहर याःगु झिपु झिपु हाइकुयात वय्कलं समीक्षात्मक रुपं विवेचना यानादीगु खः । हाइकुया समीक्षा यासें वय्कलं नेवाः हाइकुया स्तर दक्षिण एशियाय् हे च्वन्ह्याना वनाच्वंगु विचाः प्वंकादिसें थुकी नेवाः हाइकुया भविष्य बांलाना वनाच्वंगु धयादिल ।

उगु इलय् कृष्णदास जोशी, अन्जना ताम्राकार, राधेश्याम महर्जन व प्रदीप तुलाधरं निकू निकू हाइकु वाचन यानाः न्यकादीगु खःसा हाइकु ख्यलं प्रकाशन याःगु ‘सवाः’ नांया स्वलापौ (अनलाइन संस्करण)या नं पितब्वज्या यानादीगु खः ।

नेपालभाषा टाइम्स

च्वमिया मेमेगु

• तोखाया धर्म संस्कृति सम्बन्धी सफू
• यःसिं हनुमानध्वाखा थ्यन
• देय दबूया स्वीक्वःगु बुसादँ हन
• आः लाइसेन्सया पलेसा क्युआर कोर्ड दुगु रसिद
• माओवादीपाखें नं खुसि मापदण्डया विरोध