मातृभाषा दिवसय ल्हुतिइ ज्याझ्वः

येँ – अन्तर्राष्ट्रिय मातृभाषा दिवसया लसताय् म्हिगः थनया ल्हुतिइ छगू ज्याझ्वः जुल । महाकवि सिद्धिदास महाजुया ‘भाषा म्वाःसा, जाति म्वाइ’ धइगु धापूयात आत्मसात यासें ‘नेपालभाषा जिगु मांभाय् खः’ धइगु नारा बियाः जूगु उगु ज्याझ्वः बालाजु बाइसधारा उद्यान दुने जूगु खः ।

हलिं नेवाः गुथि, ल्हुति कचा, शितलामाइ भजन मण्डल व तिमिला खलः, न्हुतिया मंकाः ग्वसालय् भजन मण्डलया अध्यक्ष कृष्णलाल मानन्धरया सभापतित्वय् जूगु ज्याझ्वलय् हलिं नेवाः गुथिया केन्द्रीय नायः शान्तप्रकाश श्रेष्ठ मूपाहांकथं झायादीगु खः ।

ज्याझ्वलय् पाहांकथं झायादीपिं स्थानीय समाजसेवी श्यामकृष्ण मानन्धर, तिमिला खलःया रवि रंजित, प्रगतिशील नागरिक मंचया अध्यक्ष रविन्द्रकुमार श्रेष्ठ, नेवाः बस्ती नेवाः स्कुल अभियानया संयोजक दीपक तुलाधर, ‘नेपालभाषा टाइम्स’ न्हिपौया सम्पादक सुरेश मानन्धर लगायतं नेपालभाषायात ल्यंका तयेत व थुकिया प्रवद्र्धनया निंतिं नेपालभाषाया साहित्यकारलिसें थीथी व्यक्तित्वपिंसं याःगु संघर्षयात कयाः चर्चा यानादीगु खः ।

सन् १९५२ फेब्रुअरी २१ कुन्हु तत्कालीन पूर्वी पाकिस्तानय् बंगाली भाय्यात नं राष्ट्रिय मान्यता बीमाः धकाः गुगु आन्दोलन याःगु खः, व हे न्हियात लुमंकाः संयुक्त राष्ट्र संघया युनेस्कों दँय्दसं अन्तर्राष्ट्रिय मातृभाषा दिवस हनेगु याना वयाच्वंगु खः ।

सन् १९९९ नोभेम्बर १७ तारिखकुन्हु राष्ट्र संघया मुँज्यां दँय्दसं फेब्रुअरी २१ यात अन्तर्राष्ट्रिय मातृभाषा दिवस हनेगु निर्णय याःगु खः ।
ज्याझ्वलय् आपालं स्थानीयवासी नापं थीथी ख्यःया व्यक्तित्वपिनिगु उपस्थिति दुगु खः ।