‘यःमरि’ आः अभौतिक सांस्कृतिक सम्पदा

येँ(नेपालभाषा टाइम्स)/नेवाः समुदायया विशेष सांस्कृतिक महत्वया नसाज्वलं ‘यःमरि’ अभौतिक सांस्कृतिक सम्पदाया रुपय् सुचीकृत जूगु दु । नेपाल सरकारं नेवाः समुदाय मात्रया विशेष नसाज्वलं ‘यःमरि’यात अभौतिक सांस्कृतिक सम्पदाया रुपय् सूचीकृत याःगु खः
यल महानगरपालिका संयोजन व सक्रियाताय् नेवाः खलः, पुचः, संघसंस्थाया ताःहाकःगु कुतः लिपा ‘यःमरि’यात सरकारं अभौतिक सांस्कृतिक सम्पदाकथं सूचीकृत याःगु खः । यःमरियात थुगु सम्मानित थाय् बीकेया निंतिं कुतः याना वयाच्वंगु यलया नेवाः समुदायं माःगु सकतांकथंया प्रक्रिया पूवंकेगु नापं अभौतिक सांस्कृतिक सम्पदाया रुपय् सूचीकृत यायेमाःगु दसि प्रमाण न्ह्यब्वयेधुंकाः उकियात उकथं सूचीकृत याःगु खः ।
आवश्यक दक्वं तयारी लिपा मूल्यांकन व सिफारिस समितिया सिफारिस कथं नेपाल सरकारया संस्कृति, पर्यटन, नागरिक उडड्यन मन्त्रालयं ‘यःमरि’यात अभौतिक सांस्कृतिक सम्पदाया रुपय् सुचीकृत याःगु खः ।
मन्त्रालयं थगुने अभौतिक सम्पदाया धलखय् सूचीकृत यायेगु निंतिं आह्वान याःगु खः । मन्त्रालयं याःगु आह्वानकथं १०५ गू स्वयां अप्वः आवेदन दुहां वःगु खः । उकी मध्ये विधि, प्रक्रिया पूमवंगुयात दुमथ्याकागु व यःमरियात जक उकथं सूचीकृत यानागु नं मन्त्रालयं न्ह्यथंगु दु ।
यल मनपाया १ निसें २९ गू वडाया नेवाःतय्‌सं बिउगु आवेदनयात निगू समितिं आवश्यक अध्ययन यानाः याःगु सिफारिसया लिधंसाय् मन्त्रालयं वंगु साउन २३ गते ‘यःमरि’यात अभौतिक सांस्कृतिक सम्पदाया धलखय् दुथ्याकागु खँ मन्त्रालयं धाःगु दु ।