मोतिलक्ष्मी उपासिकाया ११५ दँ जन्मजयन्ती हन

येँ (नेपालभाषा टाइम्स)- नेपालभाषाया युगान्तकारी मिसा साहित्यकार मोतिलक्ष्मी उपासिकाया ११५ दँ जन्मजयन्ती हंगु दु । नेपाल प्रज्ञाप्रतिष्ठान व नेपालभाषा मिसा खलःया मंकाः ग्वसालय् प्रज्ञाप्रतिष्ठान देवकोटा हलय् ज्याझ्वः जूगु खः ।

ज्याझ्वःया मू पाहाँ भाषा आयोगया दुजः सुरेश मानन्धरं त्वाःदेवाय् मत च्याकाः उलेज्या यानादीगु ज्याझ्वलय् प्रा. प्रेमशान्ति तुलाधरं ‘नेपालभाषा साहित्यया छम्ह सशक्त नारी हस्ताक्षर मोतिलक्ष्मी उपासिका’ विषयय् कार्यपत्र न्ह्यब्वयादीगु खः ।

ज्याझ्वलय् न्ववानादिसें मूपाहाँ मानन्धरं मोतिलक्ष्मी उपासिका अग्रगामी मिसा चेतना दुम्ह छम्ह क्रान्तिकारी व जुझारु साहित्यकार जूगु धयादिसें वय्कः सकलें मातृभाषीतय् निंतिं प्रेरणाया स्रोत जूगु खँ कनादिल । अथेहे प्रज्ञा प्रतिष्ठानया कुलपति भुपाल राईं मोतिलक्ष्मी उपासिकां नेपालभाषा व साहित्यय् यानादीगु योगदानपाखें सुं नं विमुख जुइफइमखु धयादिसें वय्कःयाबारे दुग्यंक अध्ययन अनुसन्धान जुइमाःगु खँ धयादिल । अथेहे प्रतिष्ठानया अनुवाद विभागया प्रमुख हंसावती कुर्मी हंसां मोतिलक्ष्मी उपासिकां साहित्यिक क्षेत्रय् बियादीगु योगदानयात न्हूगु पुस्तातक थ्यंकेमाःगु खँ धयादिल ।प्रज्ञा

प्रतिष्ठानया प्राज्ञ परिषद्या दुजःव भाषा (मातृभाषा कोष तथा व्याकरण) विभागया प्रमुख त्रैलोक्यमान बनेपाली ‘अगिव’या सभापतित्वय् ज्याझ्वः जूगु खः । ज्याझ्वलय् न्ववानादिसें वय्कलं मोतिलक्ष्मी उपासिका नेपालभाषा साहित्यय् जक मखु मुक्कं नेपाःया साहित्यया प्रेरणादायी व क्रान्तिकारी नारी हस्ताक्षर जूगु खँ धयादिल ।

अथेहे ज्यापौ न्ह्यब्वयादिसें प्रा. प्रेमशान्ति तुलाधरं कविकेशरी चित्तधर हृदयया प्रेरणा व प्रशिक्षणय् च्वसा न्ह्याकादीम्ह मोतिलक्ष्मीं राणाकालीन कालरात्रीया इलय् नं देशकालया परिस्थितिलिसे ल्वानाः नेपालभाषाया संरक्षण व सम्वद्र्धनया निंतिं न्ह्याःवंगु खँ न्ह्यथनादिल । अथेहे जेलय् लानाच्वंम्ह दाजु चित्तधरयात थीथी जुक्ति लगे यानाः जेल दुने हे च्वय् ब्वनेत माःगु सामग्री थ्यंकाबियाः साहित्य सिर्जनाया निंतिं अभिप्रेरित यायेगु व वय्कलं जेलय् च्वयादीगु रचनायात गोप्य रुपं जेलं पिने हयाः सुरक्षित यायेगु ज्या यानादीम्ह मोतिलक्ष्मी त्याग व बलिदानया प्रतिमूर्ति जूगु खँ कनादिल ।

वय्कः नेपालभाषाया न्हापांम्ह आधुनिक बाखं च्वमि व नेपाली भाषाया न्हापांम्ह मिसा बाखं च्वमि कथं म्हसिका दुम्ह खँ न्ह्यथँसें मोतिलक्ष्मी नीति, उपदेशमूलक, दार्शनिक व स्वच्छन्दतावादी दृष्टिकोण दुम्ह साहित्यकार जूगु खँ कनादिल । मिस्तय्त जक दुथ्याकाः नेपालभाषा मिसा खलः थेंज्याःगु संस्था नीस्वनाः मोतिलक्ष्मी उपासिकां नेपालभाषाया श्रीवृद्धि व उन्नयनया निंतिं ज्या यानादीगु खँ नं प्रा. तुलाधरं न्ह्यथनादीगु खः ।

वय्कःया कार्यपत्रयात कयाः प्राज्ञपिं चेतनाथ धमला व सूर्यप्रसाद यादव, सहभागीपिनि पाखें तिलकप्रकाश कायस्थ, शाक्य सुरेन, हरिशरण राजोपाध्याय शर्मां थःथःपिनि न्ह्यसः तयादीगु खः । ज्याझ्वलय् लोककवि राजभाइ जकःमिं मोतिलक्ष्मी उपासिका शीर्षकय् कविता ब्वनाः न्यंकादीगु खः ।
नेपालभाषा मिसा खलःया अध्यक्ष धर्मशोभा तुलाधरं सुभाय् देछायादीगु ज्याझ्वलय् साहित्यकार कृष्णलाल प्रधान व नेवाः देय् गुथिया अध्यक्ष पवित्र वज्राचार्यं नं न्ववानादीगु खः ।