भदौ २३ य् महाधिवेशन मजूसा कांग्रेस नं अवैध
येँ – प्रधानमन्त्री शेरबहादुर देउवाया पार्टी नेपाली कांग्रेस हे अवैधानिक जुइगु खतराय् लाःगु दु । कांग्रेसया हे वरिष्ठ नेता रामचन्द्र पौडेलं सोमवाः फेसबुकय् छगू पोष्ट यासें कांग्रेस अवैधानिक जुइगु खतराय् थ्यंगु धासें असन्तुष्टि प्वंकादीगु दु । पौडेलं यदि वइगु भदौ २३ गते तक नं न्हूपिं पदाधिकारी निर्वाचित यायेमफुत धाःसा ‘निर्वाचन आयोगय् वनाः भिख फ्वंवने मालीगु अवस्था’ वइगु खँ धयादीगु खः ।
संविधान कथं छुं नं राजनीतिक पार्टीं हरेक न्यादँय् छक्वः केन्द्र व प्रदेश तहया पदाधिकारीया निर्वाचन यायेमाः । यदि छुं कारणं अथे याये मफुत धाःसा थप खुलाया दुने निर्वाचन यायेमाः । अथेहे कांग्रेसया विधान कथं प्यदँया छक्वः महाधिवेशन यायेमाः । तर कोरोना महामारीया कारणं कांग्रेसं महाधिवेशन थः विधान स्वयां दछि लिछ्यायेधुंकूगु दुसा मेगु थप खुलाया ई नं वइगु भदौ २३ गते फुइत्यंगु दु ।
पौडेलं धाःगु दु, ‘भदौ २३ दुने नं पदाधिकारी निर्वाचन याये मफइगु धयागु नेतृत्वया चरण असफलता व लापर्वाही खः ।’
संविधानविद्तय्सं नं संविधान कथं कांग्रेसं भदौ २३ दुने महाधिवेशन क्वचायेकेमाःगु बाध्यतात्मक व्यवस्था दुगु खँ धयाच्वंगु दु । यदि संविधानं तोके यानातःगु इलय् निर्वाचन यायेमफुत धाःसा ५० हजार जरिवाना पुइकेगु व थ्व लिपा नं आलटाल यात धाःसा चुनावय् ब्वति कायेके मबीगु कानुनी व्यवस्था दु ।
कांग्रेसं वइगु भदौ १६ निसें १९ गते तक महाधिवेशन यायेगु क्वःछिनातःगु दु । तर कांग्रेस दुने ब्वलनाच्वंगु क्रियाशील सदस्यताया विवादं महाधिवेशन क्वःछिनातःगु इलय् जुइगु सम्भावना धाःसा तसकं म्हो जक खने दयाच्वंगु दु ।
पौडेलं यदि गनं क्रियाशील सदस्यताया ज्या क्वमचाःनिसां अन महाधिवेशन स्थगित यानाः न्हापाया महाधिवेशन इलय्या सदस्यपिनिपाखें हे जूसां निर्वाचन यायेमाःगु सुझाव बियादीगु दु ।
पार्टीया महाधिवेशन जुइगु ई हे अलमल जुयाच्वंगु इलय् नं कांग्रेस दुने आः सु सभापति जुइगु व सु सु जानाः प्यानल दयेकेगु धइगु खँय् धाःसा व्यापक रुपं ‘होम वर्क’ जुयाच्वंगु खँ धाःगु दु ।
LEAVE YOUR COMMENTS