देय् दबुलिं अधिकार सम्बन्धी सफू पिथन

येँ(नेपालभाषा टाइम्स)- नेवाः देय् दबुलिं भाषिक, जातीय बारे अन्तर्राष्ट्रिय अधिकार सम्बन्धी थीथी सफू पिथंगु दु । देय् दबूया केन्द्रीय ज्याकू टेकुइ जूगु ज्याझ्वलय् भाषिक व जातीय पहिचान व अधिकार सम्बन्धी थीथी जानकारीमूलक सफू पिथंगु खः ।

नेवाः सांस्कृतिक संरक्षित क्षेत्र प्रशिक्षक प्रशिक्षण तालिमय् स्रोत व्यक्तिपिंत सुभाय् पौ लःल्हायेगु झ्वलय् नेवाः भासं च्वयातःगु आइएलओ–१६९, युएनडीआरआइपी (अनड्रिप), एफपीआईसी (एफपीक) सफूया पितब्वज्या याःगु खः ।

देय् दबूया केन्द्रीय नायः पवित्र वज्राचार्य, नेवाः मिसा दबूया संरक्षक नापं देय् दबूया न्वकु रश्मिला प्रजापति व नेवाः मिसा दबूया नायः कस्तुरी श्रेष्ठं मंकाःकथं उगु सफूत पितब्वज्या यानादीगु खः ।

ज्याझ्वलय् नवासें देय् दबूया नायः वज्राचार्यं नेवाःत थःगु अधिकारया निंतिं आदिवासी जनजातित नाप जानाः न्ह्यज्याः वनेत अन्तर्राष्ट्रिय अधिकार सम्बन्धी थुगु जानकारीमूलक सफुतिं ग्वाहालि याइगु विश्वास प्वंकादिल । लिसें वय्कलं भाषा, कला, संस्कृतिनापं जन्मनिसें मृत्युतकया संस्कारयात जीवन्त याना तयेत नेवाःतय् राष्ट्रिय संगठनं न्ह्याका वयाच्वंगु थीथी ज्याझ्वःया बारे नं जानकारी बियादिल ।

देय् दबूया न्वकुलिसें मिसा दबूया संस्थापक नायः प्रजापतिं ख्वना, बुंग थेंज्याःगु नेवाःतय् ऐतिहासिक वस्तीय सेनापाखें यानाच्वंगु अतिक्रमण विरुद्ध आः स्थानीय आदिवासीत थःगु हक अधिकारयात कयाः सचेत जुइमाः धयादिल ।

वंगु असार ८ निसें १० तक स्वन्हुयंकं जूगु तालिमया प्रशिक्षकपिं हनापौ नं लःल्हाःगु ज्याझ्वः मिसा दबूया नायः श्रेष्ठया सभापतित्वय् जूगु खः ।