मेलम्ची ः बचे यायेत तकं दँ दँ बीगु अनुमान
येँ – दँ दँ बिकाः बल्ल बल्ल लः वयेगु शुरु जूगु मेलम्ची परियोजना आः हानं सञ्चालन यायेगु खःसा यक्व हे ई व ध्यबा खर्च जुइगु प्रारम्भिक अनुमान विज्ञतय्सं याःगु दु । उमिसं धाः कथं थ्व ज्याय् गुलि ध्यबा खर्च जुइ धकाः आः हे धाये फइगु अवस्था मदुनि, छाय्धाःसां थुकियात बचे यायेगु खःसा आः छु उपाय ज्वने माली धयागु खँ हे आः तक क्वःछी फयाच्वंगु मदुनि ।
मेलम्चीइ खुसिइ लिपा निक्वःखुसी वःगु खुसिबालं अनया रातोपुल धाःगु छपु ताँ चुइका हःगु भिडियो यक्व भाइरल जूगु खः । मेगु खुसिइ जूसा अज्याःगु नँयागु ताँ चुइका हःसा ताँ खुसिइ डुबे जुइ माःगु खः । तर उगु ताँ डुबे मजू । बरु रेल थें सुल्ल लःया च्वं च्वं हे बाः वन । ताँ लखय् डुबे मजुसे सुल्ल बाः वंगुया कारण उगु लखय् ल्वहँचा (ग्रेगरान) त यक्व दुगुलिं खः । मेलम्चीइ वःगु खुसिबाःलय् लः सिबें नं थज्याःगु ग्रेगरान यक्व दु । मेलम्ची परियोजनालिसे स्वापू दुगु फुक्क धइथें संरचना थज्याःगु ग्रेगरान दुने ल्हानाच्वंगु दु । उकियात चीकेगु तसकं थाकुगु ज्या खः ।
विज्ञतय्सं धाःकथं उकियात चीकां जक नं मगाः । छाय्धाःसां मेलम्ची खुसिइ आः तक नं अज्याःगु हे ग्रेगरान बाः वयाच्वंगु दनि । मेलम्चीया मू स्रोत जुयाच्वंगु खुसिइ हे प्रशस्त मात्राय् अज्याःगु ग्रेगरान बाः वयाच्वंगु दनि । उकिं आः छुं उपाय यानाः ग्रेगरान चीकेत सफल हे जूसां नं कन्हय् हानं मेगु खुसिबाः वयाः अज्याःगु हे ग्रेगरान चुइका हइगु सम्भावना यक्व दु ।
मेलम्ची खुसि बाः वयाच्वंगु च्वय्या पहाडी लागाय् स्वयेगु खःसा अज्याःगु ग्रेगरान बाः वइगु आपालं पहाडय् चलः वनाच्वंगु दु । उकिं दँ दँ तक नं ग्रेगरान चुइका हइगु सम्भावना दनि । थज्याःगु अवस्थाय् आः मेलम्ची परियोजनाया संरचनात गुगु थासय् दयेकातःगु खः, व थाय् थ्व संरचना निर्माण यायेत उपयुक्त थाय् खः लाकि मखु धइगु खँय् तकं न्ह्यसःचिं पिहां वःगु दु ।
खानेपानी मन्त्रालयया विज्ञत आः मेलम्चीया स्रोत दुथाय् हे वनाः गुलि ग्रेगरान दु, गुलि इलय् बाः वयेफु आदि खँया अध्ययन याः वनाच्वंगु दु । थनया भौगर्भिक अध्ययन यायेगु लागिं मन्त्रालयं विदेशी संस्थातय्त नं इनाप यानाच्वंगु दु ।
थुपिं खँया पूवंक अध्ययन यानाः छगू ठोस निष्कर्ष पिहां मवःतले मेलम्चीया भविष्य थथे हे जुइ धाये मफुगु खँ धाःगु दु । अथे खःसां अस्थायी रुपं जूसां लः छ्वयेगु उपाय मालेगु ज्या नं जुयाच्वंगु खँ धाःगु दु ।
LEAVE YOUR COMMENTS