थौं माइितघर मण्डलाय् तःजिगु धर्ना

येँ – सडक विस्तार पीडित संघर्ष समितिं थौं सुथय् १० बजे निसें न्हिनसिया १ बजे तक माइतीघर मण्डलाय् धर्ना बीगु जूगु दु । धर्ना ज्याझ्वलय् आपालं नेवाः न्ह्यलुवापिंसं ब्वति काइगु खँ सघर्ष समितिया दुजः जितेन्द्र वज्राचार्यं ‘नेपालभाषा टाइम्स’ यात कनादिल । थौंया थ्व धर्ना ज्याझ्वलय् हाकुगु पट्टी चिनाः विरोध प्वंकेगु तयारी जुयाच्वंगु जानकारी नं भाजु वज्राचार्यं बियादीगु दु ।

सडक विस्तार पीडित संघर्ष समितिं उचित क्षतिपूर्ति बियाः जक छेँ बुँ कायेमाःगु माग यासें सर्वोच्च अदालतय् रिट दायर याःगु खःसा उकिया सुनुवाई यासें वंगु असोज २ गते हे सर्वोच्च अदालतं उचित क्षतिपूर्ति बियाः जक अधिग्रहण यायेमाःगु आदेश जारी याःगु खः । तर उगु आदेशया पूर्ण पाठ धाःसा आः तक नं सर्वोच्च अदालतं तयार मयाःनि । उगु आदेशया पूर्ण पाठ याकनं तयार यायेमाल धासें थौं धर्ना बीत्यंगु खः ।

धर्नाय् थीथी जातीय खलः पुचलं थःपिनिगु व्यानर सहित ब्वति काइगु जानकारी नं भाजु वज्राचार्यं बियादीगु दु । अथेहे फास्ट ट्रयाक, आउटर रिङरोड, स्याटलाइट सिटी, बागमति करिडोर, १३३ केभी प्रसारण लाइन, सुरङ मार्ग आदि क्षेत्रया जनतां नं उगु धर्ना ज्याझ्वलय् ब्वति काइगु खँ धाःगु दु ।

वय्कलं न्ह्यःने धयादी, ‘आःया मुद्दा धइगु सडक विस्तारया जक मखु थीथी कथंया समस्या वयाच्वंगु दुसा थुकिं ९५ प्रतिशत नेवाःत पीडित जुयाच्वंगु दु । उकिं आः झीगु माग धइगु विकासया नामय् यायेत्यंगु नेवाःतय्गु विस्थापन पने माल धइगु खः । थुकियात पनेमाःगु माग यानाः थुगु आन्दोलन न्ह्याकागु खः ।’

स्वनिगःया बारे छुं नं निर्णय यायेमाःसा थनया आदिवासी नेवाःतय् अनुमति कायेमाःगु खँ कनादिसें वय्कलं धयादी, ‘गाडी गइपिं दक्वं पिने यापिं अले सडक विस्तारया नामय् नेवाःतय्त विस्थापित यायेगु ज्या उचित मखु ।’ सडक विस्तारया विकल्प मालेमाःगु खँ कनादिसें वय्कलं सांस्कृतिक व ऐतिहासिक थाय्या विनाश जुइगु पनेगु निंतिं नं थौंया धर्ना महत्वपूर्ण जुइगु खँ धयादीगु दु ।