सक्वय् माधवनारायण धलं दनेत व मेलाया निंतिं तयारी क्वचाल

सक्व (नेपालभाषा टाइम्स)÷ मिला पुन्हिनिसें सी पुन्हि लछि तक सक्व देय् नारी खुसिइ श्रीमाधवनारायणया धलं दंकेगु व मेलाया निंतिं तयारी पूवंगु दु । येँया शंखरापुर नगरपालिकाय् लाःगु सक्वय् दँय्दसं थें थुगुसि थ्व हे पुस २२ गते निसें माघ २२ गतेतक श्रीमाधव नारायण स्वस्थानी वज्रत संचालन जुइ ।

श्रीमाधवनारायण श्रीस्वस्थानी व्रत तथा शालीनदी सुधार समितिया नायः बालकृष्ण श्रेष्ठं धलं दनेगु व मेलाया निंतिं दक्वं तयारी क्वचाःगु जानकारी बियादीगु दु । वंगु शुक्रबार सक्व रिसोर्टय छगू पत्रकार सम्मेलन यानाः थुकिया जानकारी बिउगु खः ।

अध्यक्ष श्रेष्ठं नारी खुसिइ लछि तक धलं दनीपिं ब्रतालुपिनि सेवा व सुविधाया निंतिं न्हापा हे लगत संकलनया निंतिं नां दर्ताया व्यवस्था यानागु जानकारी बियादीसें भक्तजनपिनिगु निंतिं नं स्वास्थ्यकःमि सहितया प्राथमिक उपचार कक्ष तयाः निःशुल्क रुपय् वासः, निःशुल्क त्वनेगु लःया व्यवस्था यायेगु, कोभिडया जोखिमयात ध्यानय् तयाः निःशुल्क मास्क वितरण यायेगु जानकारी बियादीगु खः ।

मेलाय् देश व विदेशपाखें ३० निसें ३५ लाखतक धार्मिक पर्यटक वइगु शालीनदी सुधार समितिं अपेक्षा यानातःगु थुगु मेलाया निंतिं सक्वय् माक्व बसया व्यवस्था यायेगु, प्रत्येक बसय् भाःया धलः तकं तिकाः सेवा सुविधा बीगु, सुरक्षाया निंतिं नारी खुसि लागाय् थीथी थासय् सिसिटिभी क्यामेराया व्यवस्था तयेगु लिसें सामुदायिक प्रहरी सेवा केन्द्र व महानगरीय प्रहरी प्रभाग सक्वया पुचः परिचालन यायेगु जानकारी नं पत्रकार सम्मेलनय् बिउगु खः ।