प्रमपाखें नं खुसि मापदण्डया विरोध
येँ (नेपालभाषा टाइम्स)- स्वनिगःया खुसि सिथय् जवंखवं ४० मिटर तक छेँ दने दइ मखु धकाः सर्वोच्च अदालतं याःगु फैसला विरुद्ध सतक विस्तार व खुसिया मापदण्ड विस्तार पीडित संघर्ष समितिं म्हिगः प्रधानमन्त्री केपी शर्मा ओलीयात नापलानाः ज्ञापनपत्र लःल्हात ।
ज्ञापन लःल्हाना कासें प्रम ओलीं सर्वोेच्च अदालतं छुं हे कथंया अध्ययन मयासे थज्याःगु फैसला याःगु बिचाः तयादिल । लिसें वय्कलं थ्व आदेश विरुद्ध आः थःपिं पुनरावलोकनय् वनेत्यनागु जानकारी नं बियादीगु खः । थ्व आदेश लागू यात धाःसा येँया चकंछि बस्ती सखाप जुइफु धासें थुकिया विरुद्ध थःपिंसं तयेत्यनागु पुनरावलोकनयात सर्वोच्च अदालतपाखें न्याय दइ धइगु आशा नं यानादिल ।
ज्ञापनपौ लःल्हायेत वंगु पुचःया नेतृत्व यानादीम्ह अभियन्ता सुमन साय्मिं सर्वोच्च अदालतं आः कायम याःगु न्हूगु मापदण्ड खारेज याकेत पहल याये धकाः बचं बियादीसां पुलांगु मापदण्डं स्थानीय जनतायात लाकाच्वंगु लिच्वःबारे धाःसा छुं न्वमवाःगु खँ कनादिल । उपत्यका विकास प्राधिकरणं २०६५ सालय् खुसिया जःखः २० मिटर थाय् त्वःतेमाः धकाः कायम याःगु मापदण्डं हे आपालं स्थानीयवासी पीडित जुयाच्वंगु खँ कँसें साय्मिं धयादिल, ‘आः उकी नं मेगु २० मिटर थपे याःबलय् मनूत ला झन् हे पीडित जूगु दु ।’
न्हूगु मापदण्ड कथं स्थानीयवासीया जग्गा कायेगु खःसा सरकारं मुआब्जा पुलाः जक कायेमाः धकाः सर्वोच्च अदालतं न्हापा जारी यानातःगु आदेश पूवंकेगु खँय् नं सरकार सकारात्मक खने मदुगु खँ साय्मिं कनादिल । सरकारं कि मखुसा मुआब्जा पुलाः जग्गा दुकाये माल, कि मखुसा अन तयातःगु मापदण्ड फुकुवा याये माल धकाः सरकारयात इनाप यानाच्वनागु खःसां उकियात वास्ता मयाःगु द्वपं नं साय्मिं बियादिल । म्हिगः प्रम ओलीयात थुकियाबारे कनागु खःसां वय्कलं थुकिया बारे धाःसा छुं न्वमवाःगु खँ वय्कलं कनादिल ।
साय्मिया कथं आः ४० मिटरया मापदण्ड खारेज हे याःसां न्हापाया २० मिटरवाला मापदण्डपाखें पीडित जुयाच्वंपिनि मागयात धाःसा राज्यं सम्बोधन यानाच्वंगु मदु ।
थ्वहे झ्वलय् म्हिगः नेकपा (एमालें) उपप्रधान लिसें शहरी विकास मन्त्री प्रकाशमान सिंहयात नं थ्व विषयय् ज्ञापनपौ लःल्हाःगु दु । एमालेया शहरी विकास मामिला विभागया प्रमुख शेरबहादुर तामाङया नेतृत्वय् वंगु उगु पुचलं उपप्रम सिंहयात ९ बुँदा दुगु ज्ञापन लःल्हाःगु खः । ज्ञापन लःल्हासें एमाले नेता तामाङं थ्व मापदण्ड लागू जुल धाःसा स्वनिगः दुने ६ लाख मनू विस्थापित जुइ फइगु खँ कनादिल । लिसलय् उपप्रम सिंहं जनतायात मारय् लाकीगु छुं नं मापदण्ड स्वीकार याये मफइगु खँ कनादीगु खः ।
LEAVE YOUR COMMENTS