ने. सं. ११४३ चौलाथ्व तृतीया -

३६ मखु ५२६ पु वा

मनूया म्हुतुइ सामान्यतयाः ३६ पु वा दइ । थ्व झी सकसिनं सिउ । अपवादया रुपय् छुं मनूतय् २८ पु वा ३० पु वा दुपिं नं मदुगु मखु । छम्ह हे मनूया म्हुतुइ ५०, ५०, १००, २०० मखु ५२६ पु वा दुगु धइगु खँ छिं पत्याः यानादी ला ? छि जक मखु, सुं नं पत्याः जुइमखु ।

तर भारतया चेन्नईस्थित छगू डेन्टल कलेजया चिकित्सकतय्सं छम्ह ७ दँ जक दुम्ह रविन्द्रन नांया मचाया म्हुतुं ५२६ पु वा लिकयागु दावी याःगु दु । चेन्नईया सविता डेन्टल कलेजया चिकित्सकतय्सं उकथं छम्ह मचाया म्हुतुं ५२६ पु वा लिकयागु दावी याःगु खः ।

चिकित्कसकय्कथं छम्ह मनूया म्हुतुं थुलिमछिं मात्राय् वा लिकाःगु थ्व विश्वया हे न्हापांगु घटना खः । थुकियात ‘कम्पाउन्ड कम्पोजिट अन्डोटोम’या नां बिउगु दु ।रविन्द्रन नांया उम्ह मचाया न्यताः मना वइगु व तसकं वा स्यानाः समस्या जुइवं वयात क्यनेत उगु अस्पतालय् यंकूगु खःसा चिकित्सकतय्सं वयागु म्हुतुया परीक्षण याःगु इलय् अस्वाभाविक रुपं वाया ल्याः अप्वः दुगु पत्ता लगे याःगु खः ।

कलेजया डेन्टल सर्जन डा. पी. सेन्थिल नाथनं मचाया म्हुतुया एक्स रे व सिटी स्क्यान याना स्वःगु इलय् थुलिमछिं वा दुगु पत्ता लगे जूगु खः ।रविन्द्रनया म्हुतुइ दुगु वामध्ये गुलिखे वा ला बांलाक बुया वःगु तकं मदुनि । अथे खःसां वयात जुयाच्वंगु समस्याया निंतिं अपरेसन यानाः वा लिकायेमाःगु निर्णय चिकित्सकतय्सं याःगु खः ।

मचाया अपरेसन याःम्ह डेन्टिस डा. सेन्थिल नाथनया कथं मचाया म्हुतुइ च्वंगु गुलिखे वा पिने मखसे लाया दुनेया भागय् लानाच्वंगु खः, गुगु पिने स्वयेबलय् खनेमदु । अपरेसन यानाः मचाया वाकुधी हे लिनाः स्वःगु इलय् वाकुधी दुने तपुगु, मध्यम व चिपुगु यानाः ५२६ पु वा पिहां वःगु खः ।