स्वनिगःया स्वंगुलिं सहरय् रुद्री पाठ

यल – राजोपाध्याय समाजं स्वनिगःया स्वंगुलिं सहरय् छन्हुं छगू हे इलय् रुद्री पाठ याःगु दु । समाजपाखें स्वनिगःया येँ, यल व ख्वपय् छन्हुं छगू हे इलय् पञ्चाभिषेक रुद्री पाठ याःगु खः ।

कोरोना महामारीपाखें देय् व जनतायात मुक्त यानाः आम जनताया सुस्वास्थ्यया कामना यासें स्वनिगःया स्वंगुलिं सहरया लाय्कू लागाय् च्वंगु शिवालयय् उकथं पञ्चाभिषेक रुद्री पाठ ज्याझ्वः याःगु खः ।

वैज्ञानिकतय्सं खोप दयेकाच्वंगु दु, चिकित्सक व स्वास्थ्यकर्मीत संक्रमिततय् उपचार यानाच्वंगु दु, व्यापारीतसें उपचार व खोपया निंतिं माःगु ग्वाहालि यानाच्वंगु दु थज्याःगु अवस्थाय् जिपिं ब्राम्हण समुदायपाखें वेद पाठ यानाः थुकियापाखें महामारीं मुक्त जुइमा धइगु कामना यानागु खः’ समाजया नायः संजय शर्मा राजोपाध्यायं कनादिल ।
स्वंगुलिं जिल्लाय् न्याम्ह न्याम्ह राजोपाध्याय देव ब्राम्हणपाखें पञ्चाभिषेक रुद्री पाठ यायेगु ज्या जूगु वय्कलं कनादिल ।

यलय् अमरराज राजोपाध्याय, महेशबाबु शर्मा राजोपाध्याय, गजानन्द राजोपाध्याय, विष्णुचन्दन राजोपाध्याय, व रविन्द्र धर शर्मां ख्वपय् बालाधर शर्मा राजोपाध्याय, प्रमोद राजोपाध्याय अन्जन राजोपाध्याय, राजन राजोपाध्याय व सरोजन राजोपाध्यायं व येँय् कविन्द्र शेखर रिमाल, किशोर शर्मा राजोपाध्याय, श्रीमणी राजोपाध्याय, राजीव राजोपाध्याय व आभाष राजोपाध्यायं वेद पाठ यानादीगु खः ।

थुकथंया पञ्चाभिषेक रुद्री पाठ ज्याझ्वः लय् छक्वः दछियंकं न्ह्याकेगु योजना दुगु समाजं जानकारी बिउगु दु ।