जाँच न्ह्यः खोप बीत उजं

येँ -प्रतिनिधि सभाया स्वास्थ्य समितिं कक्षा १२ या विद्यार्थीतय्त परीक्षा न्ह्यः खोप बीत सरकारयात उजं बिउगु दु । शिक्षा, विज्ञान तथा प्रविधि मन्त्रालयया अधिकारीतलिसे सहलह लिपा समितिं उगु उजं बिउगु खः । समितिं संक्रमण जुयाः सुं विद्यार्थीं जाँच बी मफुत धाःसा उमित निगूगु चरणया जाँचय् च्वने दइगु व्यवस्था यायेत नं निर्देशन बिउगु दु । समितिं परीक्षा न्ह्यः हे कोरोना परीक्षण यानाः संक्रमण खनेदुपिं विद्यार्थीतय्त निगूगु चरणय् परीक्षा बीगु व्यवस्था यायेत उजं बिउगु खः ।

समितिं ४ लाख विद्यार्थीयात परीक्षा बी न्ह्यः खोप बीगु पहल या धासें साउन ३१ गते निसें परीक्षा न्ह्याइगु जूगुलिं अझ नं ई दनिगु खँ धाःगु दु । उकथं हे समितिं अप्वः विद्यार्थी दुगु स्कुलयात जाँच कायेत थाकुइगुलिं परीक्षा केन्द्र थपे यायेत नं सरकारयात सुझाव बिउगु दु ।

राष्ट्रिय परीक्षा बोर्डं वइगु साउन ३१ गते निसें भदौ ९ गते तक १२ कक्षाया परीक्षा न्ह्याकेगु तालिका सार्वजनिक याःगु दु । कोरोना संक्रमण अप्वया वनाच्वंगुलिं थुगुसी नं विद्यार्थीतय्सं थःपिं ब्वनाच्वंगु विद्यालयं परीक्षा बीगु व्यवस्था यानातःगु दु । वंगु जेठ महिनाय् जुइमाःगु परीक्षा कोरोना संक्रमण अप्वया वनेवं स्थगित जुयाच्वंगु खः ।