कोशी विरुद्ध आमहडताल लित काल
येँ (नेपालभाषा टाइम्स)÷पहिचान पक्षधरतय्सं प्रदेश १ य् थनिंनिसें यायेगु धकाः घोषणा यानातःगु अनिश्चित– कालीन हडताल लितकाःगु दु । आइतवाः ज्वंपिं २६ म्ह नेता कार्यकतांत मत्वःतूगु धासें प्रदेश १ पुनः नामांकन संयुक्त संघर्ष समितिं थनिनिसें अनिश्चिकालीन आमहडताल घोषणा यानातःगु खः ।
म्हिगः न्हिनय् जिल्ला प्रशासन कार्यालय मोरङय् जूगु सहलहया झ्वलय् ज्वनातःपिं कार्यकर्ता त्वःतेगु सहमति जूगुलिं आमहडताल लित काःगु खः । उकथं हे सहलहया झ्वलय् पहिचान पक्षधरया आन्दोलनयात शान्तिपूर्ण यायेगु सहमति जूगु दु । सहमति लिपा म्हिगः हे आइतवाः ज्वनातःपिं २६ म्हेसित त्वःतूगु दु ।
आइतवाः आन्दोलनया झ्वलय् प्रहरीं ८६ म्हेसित ज्वंगु खः । ज्वंपिं मध्ये ६० म्हेसित वकुन्हु हे बहनी त्वःतूगु खःसा २६ म्हेसित मुद्दा न्ह्याकेगु धकाः कुनातःगु खः । अनिश्चितकालीन आमहडतालया घोषणा लिपा जिल्ला प्रशासन कार्यालयं आन्दोलनकारीत सःताः सहलह ब्याकूगु खः ।
आमहडताल लित काःसां प्रदेशसभा केन्द्रित शान्तिपूर्ण आन्दोलन धाःसा जारी जुइगु खँ धाःगु दु । थौं नं प्रदेशसभाया बैठक च्वनेगु तयारी जुयाच्वंगु दुसा उगु बैठकयात लक्षित यानाः शान्तिपूर्ण आन्दोलन जुइगु खँ धाःगु दु । वंगु आइतवाः जूगु प्रदर्शनय् ५७ म्ह घाःपाः जूगु खः ।
LEAVE YOUR COMMENTS