इन्टरनेट सेवा बन्द जुइ फइगु ख्याच्वः

येँ (नेपालभाषा टाइम्स)÷ इन्टरनेट सेवा प्रदायकतय्सं गुगुं नं इलय् इन्टरनेट सेवा बन्द जुइ फइगु ख्याच्वः बिउगु दु । इन्टरनेट सेवा प्रदायक संघ नेपाल (आईस्पानं) म्हिगः पत्रकार सम्मेलन यासें नेपाल विद्युत प्राधिकरणं पोल बालं बीगु खँय् यःयःथे याःगु जुयाः इन्टरनेट सेवा हे दी फइगु ख्याच्वः बिउगु खः ।

पत्रकार सम्मेलनय् न्ववासें आईस्पानया अध्यक्ष सुधीर पराजुलीं विद्युत प्राधिकरणं लाथेपाथे यात धाःसा इन्टरनेट हडताल यायेत थःपिं बाध्य जुइगु खँ कनादिल । वय्कलं धयादिल,
‘जिमिसं आः ताःचाः प्राधिकरणय् बुझे यायेगु जुइ ।’

अध्यक्ष पराजुलीं प्राधिकरणं गुगुं नं कथंया समन्वय मयासे इन्टरनेट फाइबर तार देय्न्यंकं चानाः दादागिरी क्यंगु धासें प्राधिकरणया एकाधिकार आः सह्य मजुइगु खँ नं धयादिल । विद्युत प्राधिकरणं थः यत्थे पोलया भाः थकाःगु व थःपिंसं पुला वयाच्वनागु दु धासें वय्कलं धयादिल, ‘राज्यं डिजिटल नेपाः दयेकेगु नितिं थःगु फुक्कं स्रोत उकी लगानी यानाच्वंगु इलय् राज्यया हे छगू अंगं डिजिटल नेपाःया दुगःक्वँय् धयातःगु इन्टरनेट कनेक्सन हे पनेगु क्षमता दु धकाः दम्भ क्यनाच्वंगु दु । प्राधिकरणयात पुलेमाःगु बाः जिमिसं पुलाच्वनागु दु । तर प्राधिकरणं ७०० प्रतिशत तक बाः थकायेवं समस्या जुल ।’

प्राधिकरणं बाः थकायेधुंकाः राज्यया उच्चस्तरीय समिति गठन जुयाः प्रतिवेदन समेत बीधुंकूगु दुसा उकी प्राधिकरणं सही छाप याःगु खसां नं कार्यान्वयन यायेत धाःसा माने मजूगु दाबी नं आईस्पानं याःगु दु ।

सम्बन्धित बुखँ

LEAVE YOUR COMMENTS