ने. सं. ११४६ बछलाथ्व तृतीया - अक्षय तृतीया, भिक्षु प्रज्ञानन्द महास्थविरया १२६ क्वःगु बुदिं

थुगुसी अफ्रिकाय् नं न्हापांखुसी बुद्धजयन्ती हनीगु

येँ(नेपालभाषा टाइम्स)-अफ्रिकी महादेशय् थुगुसी न्हापांखुसी औपचारिक रुपं २५६७ औं बुद्धजयन्ती हनीगु जूगु दु । मध्य अफ्रिकी देय् कंगोय् थुगुसी न्हापांखुसी अन्तर्राष्ट्रियस्तरं औपचारिक रुपं बुद्धजयन्ती हनेत्यंगु खः।

उकिया निंतिं नेपाःपाखें चारुमति विहारया प्रमुख भिक्षु तपस्सीधम्म उखे बिज्यायेत्यंगु दु । कंगोय् थुगुसी अन्तर्राष्ट्रियस्तरं हनेत्यंगु बुद्धजयन्ती ज्याझ्वलय् ब्वति कायेत नेपाःपाखें थःत ब्वनापौ वःगु खँ वसपोलं ‘नेपालभाषा टाइम्स’यात कनाबिज्यात ।

कंगोय् छवाःयंकं थीथी ज्याझ्वः यानाः बुद्धजयन्ती हनेगु झ्वलय् प्यन्हु धाःसा विशेष ज्याझ्वः जुइ । न्हूपिं श्रामणेर जुइपिंत प्रव्रज्या यायेगु ज्याझ्वः नं दु ।

थ्वहे लसताय् कंगोया निर्वाण विहारयात नेपाःपाखें बुद्ध मूर्ति छम्ह नं उपहार बीगु ज्याझ्वः दु । थगुने चारुमति विहारय् जूगु कथिनोत्सवय् कंगोया निर्वाण विहारं बिज्याःम्ह भिक्षु पञ्ञाबोधिं थःगु देशय् नं बुद्धजयन्ती तःजिक हनेगु व भगवान बुद्धया मूर्ति नं तये दुसा जिउ धकाः इच्छा यानाबिज्याःगुलिं थुगुसी नेपाःपाखें बुद्धया मूर्ति उपहार बीत्यंगु खः ।

कंगोया उगु विहारयात आपालं देशं बुद्ध मूर्ति ग्वाहालि यायेत इनाप याःगु खःसां विहार प्रमुख भिक्षुं बुद्ध जन्म जूगु देय् नेपाःपाखें हे बुद्ध मूर्ति तयेगु इच्छा यानाबिज्याःगु जुयाच्वन । कंगोय् यंकीम्ह करिब ४ फुट तःधिकःम्ह बुद्ध मूर्तिइ लुं सीगु ज्या क्वचायेधुंकूगु दु । बुद्धया उगु मूर्तिया निंतिं दाता अमिर शाक्य व चारुमति विहारया उपासक उपासिकापिंसं ग्वाहालि याःगु खः ।

कंगोय जुइगु बुद्धजयन्ती ज्याझ्वलय् नेपाः लगायत थाइल्याण्ड, श्रीलंका आदि देशं नं भिक्षुपिंसं ब्वति काइगु खँ दु । कंगोय् जुइगु ज्याझ्वः लिपा अफ्रिकाया हे केन्या, इथियोपिया व युगान्डाया बौद्ध धर्म नं बारे जानकारी कायेगु ज्याझ्वः दुगु खँ धाःगु दु ।

खतुं कंगोय् न्हापा न्हापा नं बुद्धजयन्ती हनेगु याःसां स्थानीयस्तरं जक हना वयाच्वंगु खःसा थुगुसी न्हापांखुसी थीथी देशं भिक्षुपिंत ब्वनाः बुद्धजयन्ती हनेत्यंगु खः ।