कोराना खोप : नेपाल भण्डारण यायेगु थाय् हे मदु
येँ (नेपालभाषा टाइम्स) – कोरोना भाइरसविरुद्ध खोप विकास यानाच्वंगु जर्मनी व अमेरिकी कम्पनी लिसें रुसी कम्पनीं थःपिनि खोपं ९० प्रतिशतं मल्याक सफल जुइधुंकूगु धयाच्वंगु अवस्थाय् नेपालय् नं खोप वल धाःसा गुकथं व्यवस्थापन जुइ धयागु चर्चा नं न्ह्यःने वःगु दु। नेपालीतय्सं कोरोनाविरुद्धया खोप गुबलय् काये खनी धयागु चर्चा जुयाच्वंगु इलय् स्वास्थ्य अधिकारीतय्सं धाःसा नेपालय् खोप वल धाःसा उकियात सुरक्षित भण्डारण यायेगु पूर्वाधार तकं मदुगु खँ धाःगु दु ।
अमेरिकी कम्पनी फाइजर व बायोएनटेकं विकास याःगु खोप माइनस ७० डिग्री सेल्सियस तापक्रमय् तयातयेमाः, अथे जूगुलिं थ्व खोप व्यवस्थापनय् नेपालय् जक मखु संसारन्यंकं हे चुनौती वयेफुगु खँ पिहां वःगु दु । स्वास्थ्य तथा जनसंख्या मन्त्रालय व स्वास्थ्य सेवा विभागया उच्च अधिकारीतय्सं नेपालय् थज्याःगु खोप भण्डारण यायेगु छुं नं पूर्वाधार मदुगु खँ धाःगु दु । स्वास्थ्य विभागया बालस्वास्थ्य तथा खोप शाखाया प्रमुख झलक गौतमं बिबिसीलिसे खँ ल्हासें खोपया विकासय् सफलता चूलाःगु खँ उत्साहजनक जूसां नेपालं पूर्वाधारया कारणं हे तत्काल लाभ
काये फइगु खनेमदु धयादीगु दु ।
वय्कलं धयादीगु दु, ‘आःयात झीके खोप तयेगु पूर्वाधार मदुनि । थुकिया लिसें थ्व खोपया बार फुक्कं तथ्यांक नं पिहां वःगु मदुनि । जिमिसं मेगु झिगू स्वंगूगु चरणया क्लिनिकल ट्रायलय् वनाच्वंगु खोपया नं छु गज्याःगु प्रगति जुयाच्वंगु दु धयागु स्वयाच्वनागु दु ।’ वय्कलं आः विकास यानाच्वंगु फुक्कं खोपयात माइनस डिग्री तापक्रम माः धकाः वयामच्वंगु जूगुलिं मेमेगु खोपया परीक्षण लिच्वः गज्याःगु वइ धकाः थःपिंसं स्वयाच्वनागु खँ नं धयादीगु दु ।
स्वास्थ्य मन्त्रालयया प्रवक्ता डा. जागेश्वर गौतमं खोप विकास पूवंक मजूनिगुलिं आःया टिप्पणी यायेगु आवश्यक मदुनि धयादीगु दु, तर वय्कलं नं खोप वल धाःसा भण्डारण यायेगु पूर्वाधार धाःसा मदुगु स्वीकार यानादीगु दु । नेपाः स्वास्थ्य मन्त्रालयया अधिकारीतय्सं खोप नेपाः हयेगु निंतिं आवश्यक श्रोत साधनया विषयय् आन्तरिक अध्ययन धाःसा न्ह्यायेधुंकूगु खँ धाःगु दु । प्रवक्ता गौतमं धयादीगु दु, ‘२ निसें १० डिग्रीइ तक तयेमाःगु खोप भण्डारण यायेगु थाय् झीथाय् दु, तर आः गज्याःगु कथंया खोप बने जुइ, उकिया निंतिं गज्याःगु संरचना दयेकेमाली धकाः तयारी ज्या धाःसा न्ह्यानाच्वंगु दु ।’
LEAVE YOUR COMMENTS