वने त्ययेकाः ओलीपाखें नेपाल पुचःया कडा आलोचना

येँ – निवर्तमान प्रधानमन्त्री केपी शर्मा ओलीं संसद भंगया मुद्दाय् सर्वोच्च अदालतं याःगु फैसलाप्रति असन्तुष्टि प्वंकादीगु दु । म्हिगः राष्ट्रया नामय् यानादीगु थःगु अन्तिम सम्बोधनय् वय्कलं थ्व असन्तुष्टि प्वंकादीगु खः ।

लिसें स्वन्हु न्ह्यः तिनि झिगू बुँदाया सहमति यानाः पार्टी एकता यायेत सहमत जुयादीम्ह माधव नेपाल पुचःयात नं गाक्कं आलोचना यासें थःगु तं प्वंकादिल । थःगु पार्टी दुने षडयन्त्र यानाः विपक्षी पार्टीया नेतायात प्रधानमन्त्री दयेकेमाः धकाः हस्ताक्षर याः जुइपिं नेतात समेत पिहां वल धकाः आक्रोश नं प्वंकादिल ।

सम्बोधनया झ्वलय् वय्कलं संविधानया सर्वोच्चता व विधिया शासनय् विश्वास याइम्ह जूगुलिं चित्त बुझे मजूसां नं सर्वोच्च अदालतया फैसला थःपिसं पालना यायेगु खँ धयादिल । तर सर्वोच्च अदालतया थ्व फैसलां राज्यया स्वंगू अंग दथुइ सन्तुलन स्यंकूगु द्वपं बिसें भविष्यय् उकिया समीक्षा जुइगु व थुकिया परीक्षण जुइ ल्यं दनिगु बिचाः नं वय्कलं तयादिल ।

वय्कलं धयादिल, ‘लोकतन्त्रया रक्षा, विकास व सुदृढीकरणय् थुगु फैसलां ग्वाहालि यात कि मयात ? राजनीतिक स्थायित्वयात तिबः बिल कि क्षति यात ? थुकिं दलीय व्यवस्था बल्लात कि कमजोर जुल ? समग्रय् राजनीतियात अग्रगामी दिशा बिल कि मबिल ? समीक्षा भविष्यं याइ ।’

वय्कलं संविधानया धारा ७६ या उपधारा ५ य् पार्टीया ह्वीप लगे जुइ मखु धकाः याःगु फैसलाय् नं असन्तुष्टि प्वंकादिल । फैसलाया गुलिखे प्रावधान व अन छ्यलातःगु भाषा शैलीं लोकतन्त्रय् विश्वास याइपिंत चिन्तित याना बिउगु बिचाः नं तयादिल ।

सम्बोधनया लागिं लिखित भ्वं तयार यानातःगु खःसां वय्कलं अप्वः धइथें ‘अफह्याण्ड’ हे न्ववासें करिब १ घन्टा प्रवचन शैलीया भाषण यानादिल । दत्या लिपा चुनाव जुल धाःसा थः हानं नं सिंहदरवारय् वयेगु हाथ्या बिसें वय्कलं अबलय् थःत सुनां नं पने मफइगु बिचाः नं तयादिल ।

प्रधानमन्त्रीया रुपय् बियादीगु सम्बोधनय् वय्कलं एमालेया कार्यकर्तातय् नामय् नं सन्देश बियादिल । एमाले कार्यकर्तातय्त आत्मबल गुमे मयायेत निर्देशन बिसें थःपिं छप्पँ जुयाः न्ह्याः वनेमाःगु खँ तयादिल ।

सम्बन्धित बुखँ

LEAVE YOUR COMMENTS