महाद्यः–पार्वती द्यः पलिस्था

येँ(नेपालभाषा टाइम्स)- हनुमानध्वाखा दरवार लागाय् च्वंगु ऐतिहासिक महाद्यः–पार्वती देगलय् कलात्मक झ्यालं स्वयाच्वंपिं महाद्यः–पार्वतीया सिँयागु मूर्ति म्हिगः पलिस्था यात । देगः जीर्णोद्धार यायेगु झ्वलय् उगु द्यः लिकयाः पुरातत्व विभागय् तयातःगु खःसा म्हिगः द्यःयात विभागं लित हसें लंपुं छानाः हानं देगलय् तुं पलिस्था याःगु खः ।

वंगु वि.सं. २०७२ सालया भुखाचं उगु देगःयात क्षति याना बिउगु खःसा आः उकियात पुनर्निर्माण यानाः हानं द्यः पलिस्था याःगु खः । देगःया पुनर्निर्माण अन्तिम चरणय् थ्यंगु व आः वइगु यँयाः जात्राया इलय् तक क्वचायेकाः सार्वजनिक यायेगु खँ पुनर्निर्माण समितिया दुजः सुजनविलास वज्राचार्यं कनादीगु दु ।

देगःया झ्यालं स्वयाच्वंपिं महाद्यः व पार्वती घय्पुयाच्वंगु थ्व मूर्ति चन्दन सिँयागु खः । क्षतिग्रस्त थ्व देगः दनेत सरकारं ३ करोड तकाया इस्टिमेट याःगु खःसां कुल खर्च धाःसा १ करोड १० लाख ति जक जूगु खँ नं वज्राचार्यं कनादीगु दु । थ्व देगः बहादुर शाहं दयेके बिउगु खः ।