बोडेया नीलबाराही प्याखं क्वचाल

थिमि(नेपालभाषा टाइम्स)- मध्यपुर थिमिया बोडेय् न्ह्यानाच्वंगु नीलबाराही प्याखं क्वचाःगु दु । वंगु गुंलागा पारु, सापारुनिसें न्ह्यानाच्वंगु प्याखं शनिवाः क्वचाःगु खः ।

सापारुकुन्हु सब्बु चान्हसिया इलंनिसें नीलबाराही प्याखं क्यनेगु शुरु जूगु खः । न्हापांगु दिं बोडेया नारायणस्थानं शुरु जूगु नीलबाराही प्याखं वयां लिपा लाय्कूछेँ, विष्णुघाट, महालक्ष्मीथान, भांगु त्वाः, ख्वःसिं त्वाः, नीलबाराही लिपा हाकनं नारायणस्थानय् थ्यंकाः प्याखं क्वचायेकूगु खः ।

थुगु प्याखं दँय्दसं गुंलागा दुतियानिसें गुंलागा पंचमितक बोडेया थीथी थासय् हुइकेगु चलन दु । नीलबाराही प्याखं ख्वपया नवदुर्गा द्यःया प्याखंलिसें शुरु जूगु धइगु मान्यता दया वयाच्वंगु दु ।

नीलबाराही प्याखय् भैरव छम्ह, बाराही प्यम्ह, कुमारी प्यम्ह, सिंहिनी प्यम्ह, द्वारपाल निम्ह व गणेश प्यम्ह यानाः मुक्कं झिंगुम्ह देवदेवी गणं दुथ्यानँच्वंगु दु । थ्व प्याखनय् सहभागि जुइपिंसं नीसी यानाः च्वनेमाःगु व सुयातं नवाये तकं मजिउ धइगु मान्यता दया वयाच्वंगु दु ।