देउवा प्रधानमन्त्री नियुक्त, राष्ट्रपतिलिसे शुरुइ हे तनाव

येँ – अन्ततः ताःहाकःगु अलमल लिपा राष्ट्रपति विद्यादेवी भण्डारीं म्हिगः नेपाली कांग्रेसया सभापति शेरबहादुर देउवायात प्रधानमन्त्री नियुक्त यानादीगु दु । देउवायात प्रधानमन्त्री नियुक्ति याःगु बारे राष्ट्रपति कार्यालयं जारी याःगु विज्ञप्ति त्रुटिपूर्ण खने दयेवं उकियात संशोधन मयाःतले शपथ ग्रहण मयायेगु खँ देउवापाखें वनेगु शपथ ग्रहणया ज्या हे लिबाः वंगु खः ।

राष्ट्रपति भण्डारीं देउवायात प्रधानमन्त्री नियुक्ति यानागु बारे पिकाःगु विज्ञप्तिइ संविधानया छु धारा कथं प्रधानमन्त्री नियुक्ति यानागु धइगु खँ हे उल्लेख मयायेवं उकियात कयाः थीथी न्ह्यसः पिदंगु खः । राष्ट्रपति कार्यालयं जारी याःगु प्रेस विज्ञप्तिइ ‘सम्माननीय राष्ट्रपति विद्यादेवी भण्डारीपाखे श्री सर्वोच्च अदालत, संवैधानिक इजलासया मिति २०७८÷०३÷२८ या फैसला कथं प्रतिनिधिसभाया दुजः लिसे नेपाली कांग्रेसया संसदीय दलया नेता माननीय श्री शेरबहादुर देउवायात प्रधानमन्त्री नियुक्ति याःगु दु’ धकाः च्वयातःगु खः । उकी देउवायात संविधानया छु धारा अन्तर्गत प्रधानमन्त्री नियुक्त यानागु धइगु खँ उल्लेख याना मतःगु खः ।

राष्ट्रपति कार्यालयपाखें अज्याःगु त्रुटिपूर्ण विज्ञप्ति पिहां वयेवं थीथी कानूनविद्तय्सं अज्याःगु विज्ञप्तिया आधारय् देउवां शपथ ग्रहण याः वने मजिउ धकाः सुझाव बिया हःगु खः । वयांलि थीथी पार्टीया नेतातय्सं शितल निवास वनाः राष्ट्रपतिया विज्ञप्ति भिंकेत दवाव बिउगु खःसा राष्ट्रपतिं उगु प्रेस विज्ञप्ति भिंकेगु खँय् आलताल यानाच्वंगु खः ।

राष्ट्रपति भण्डारीं छगू ग्रायन्ड डिजाइन कथं हे उकथं विज्ञप्ति पिकाःगु आशंका याना हःगु दु । वय्कलं विज्ञप्ति मभिंकेगु खँ नं वहे डिजाइन कथं धयाच्वंगु खँ नं धाःगु दु ।

राष्ट्रपतिपाखें विज्ञप्ति मभिंकल धाःसा शेरबहादुर देउवां नं शपथ ग्रहण याः वये मखु धकाः अडान कयादीगु खः । देउवापाखें समेत अज्याःगु अडान वयेवं तिनि राष्ट्रपति कार्यालयपाखें विज्ञप्ति भिंकेत तयार जूगु खः । राष्ट्रपतिया विज्ञप्ति भिंकेगु लागिं मुख्य सचिव शंकरदास वैरागीयात सःताः ज्या याकाच्वंगु खँ धाःगु दु । विज्ञप्ति भिंकेगु ज्या जुयाच्वंगु कारणं देउवा शितल निवास थ्यंकाः नं शपथ ग्रहण याइगु थासय् मवँसे च्वनाच्वंगु खः ।

शेरबहादुर देउवाया नियुक्तिया खँय् हे विवाद पिहां वःगु कारणं देउवाया कार्यकालय् राष्ट्रपतिलिसे शुरुंनिसें हे सम्बन्ध खराब जुइगु संकेत पिहां वःगु विश्लेषण याना हःगु दु ।
देउवां आःयात तसकं म्हो जक मन्त्रीत तयाः मन्त्रिमण्डल गठन यायेगु तयारी यानाच्वंगु दु । जसपाया उपेन्द्र यादव पुचः आः छुं न्हि लिपा जक सरकारय् सामेल जुइगु खँ धाःगु दुसा माओवादीया छुं मनू जक च्वंगु दु ।

सम्बन्धित बुखँ

LEAVE YOUR COMMENTS