एमसीसीयात गठबन्धनया स्वीकृति

येँ – प्रधानमन्त्री शेरबहादुर देउवां गठबन्धन भंग यानाः जूसां एमसीसी पास यानां त्वःते धइगु खँ न्ह्यःने हयेवं गठबन्धनय् दुथ्याःगु राजनीतिक पार्टीत गठबन्धन बचे यायेगु उपायपाखे सक्रिय जूगु दु । उकिया लागिं दलतय्सं थःपिनि शर्त सहित एमसीसी पारित यायेगु सहमति याःगु दु ।

म्हिगः गठबन्धनया तःधंगु दलया शीर्ष नेतात शेरबहादुर देउवा, पुष्पकमल दाहाल व माधव नेपाल दथुइ खँल्हाबल्हा यासें दथुया लँपु लुइकूगु खँ धाःगु दु । वय्कःपिंसं एमसीसीया प्रस्ताव न्हापा वःबलय् गथे दुगु खः अथे हे जक पास यायेगु सहमति कायम याःगु खः ।

न्हापा कांग्रेस सरकारया पालय् एमसीसी सम्झौता जूबलय् उकी संसदय् यंकाः पारित यायेमाःगु प्रावधान मदुगु खः । लिपा केपी ओलीया पालय् वयाः तिनि थुकियात संसदय् यंकाः पारित याये माःगु खँ समावेश याःगु खः । उकिं आः संसदं पारित यायेमाः धइगु बुँदा चीकाः एमसीसी पारित याना छ्वयेगु सहमति स्वम्ह शीर्ष नेतातय्सं कायम याःगु खँ धाःगु दु । थथे जुल धाःसा एमसीसी नं पास जुइगु व गठबन्धन नं बचे जुइगु खँ धाःगु दु ।

थ्वहे झ्वलय् एमसीसीयात पारित यायेत्यंगु विरोधय् देय्या चिचीधंगु २२ गू वामपन्थी पार्टीतय्सं मंकाः रुपं प्रदर्शन याइगु जूगु दु । आः वइगु माघ २३ गते न्हिनय् येँया फिब्व ख्यलय् थ्व प्रदर्शन यायेगु खँ धाःगु दु । थुकी लोकनारायण सुवेदी, सीपी मैनाली, मोहन वैद्य, आहुति लगायतया कम्युनिष्ट पार्टीत दुथ्याः ।

२२ गू कम्युनिष्ट पार्टीपाखें सीपी गजुरेलं छगू विज्ञप्ति जारी यासें २३ गतेया प्रदर्शनय् ब्वति कायेत सकसितं इनाप यानादीगु दु । विज्ञप्तिइ शेरबहादुर देउवा व केपी ओलीं अमेरिकाया न्ह्यःने पुलिं जुयाः एमसीसी पारित यायेत कुतः याःगु धकाः द्वपं बियातःगु दु ।

 

सम्बन्धित बुखँ

LEAVE YOUR COMMENTS