क्यानाडाया एडमन्टनय् तःजिक यँयाः हन
येँ – क्यानाडाया एटमन्टन सहरय् च्वंपिं नेवाःतय्सं नं तःजिक यँयाः नखः हंगु दु । नेवाः कल्चरल सोसाइटी अफ अल्बर्टाया ग्वसालय् वंगु भदौ २८ गते शनिवाः यँयाःपुन्हिकुन्हु थीथी ज्याझ्वः यासें तःजिक यँयाः नखः हंगु खः ।
संस्थाया नायः डा. हेमन्त जोशी व समाजसेवी जानकीदास रंजितकारं मंकाःकथं त्वाःदेवाय् मत च्याकाः ज्याझ्वःया उलेज्या यानादीगु खःसा उगु हे ज्याझ्वलय् गुंपुन्हि व यँयाःपुन्हिया बारे संस्थाया नायः जोशीं च्वयादीगु सपूm द्वारिकानाथ श्रेष्ठ, डा. केशव श्रेष्ठ व च्वमि डा. जोशीं मंकाःकथं पितब्वज्या नं यानादीगु खः ।
सन् २०१३ य् नीस्वंगु संस्थां स्थापनाकालनिसें हे थुकथं यँयाः नखः हनेगु याना वयाच्वंगु खःसा थुगुसी न्हय्क्वःखुसी थुगु नःखः हंगु खः । वंगु छुं दँ थुखे यँयाःया आकर्षणकथं कुमारि, लाखे, पुलुकिसिया प्याखं नं प्रदर्शन यायेगु याना वयाच्वंगु दु । थुगुसी नेपालं वंपिं चन्द्रवदन श्रेष्ठ जोशी व बेजुना जोशीं कुमारि, भैरव व गणेशया पुजा न्ह्याःगु ज्याझ्वलय् नायः जोशीं संस्थाया म्हसीका नं बियादीगु खः ।
यँयाःया लुयात पिब्वयेकथं संस्थां इन्द्र, दागिं, मरुहिति, कुमारि, पुलुकिसि, लाखे लगायतया यँयाःया इलय् पिहां वइगु थीथी देवीदेवताया वसःया ब्वज्या लिसें किम्बदन्तीकथं इन्द्रया मांयात पालिजाः स्वां माःगु व उगु इन्द्रं उगु स्वां खू वःगु, इन्द्रयात ज्वंगु दृश्यसहितया नाटकया नं प्रस्तुति बिउगु खः ।
यँयाः सम्बन्धी नाटकय् रुविन पिया, आदि ढकाल, शरद चित्रकार, केशव श्रेष्ठ, किशोर श्रेष्ठ, महेश महर्जन, रुपकक्षा न्याछ्यों, पलेस्वां चित्रकार, आयुषा मैनाली, समृद्धि श्रेष्ठ लगायतया कलाकारं अभिनय यानादीगु खःसा उकियात निर्देशन डा. हेमन्त जोशी व दिपेश श्रेष्ठं यानादीगु खः ।
अथे हे विरेन्द्र पियां लाखे, शरद चित्रकार, किशोर श्रेष्ठ व दिपेश श्रेष्ठं पुलुकिसि प्याखं न्ह्यब्वयादीगु ज्याझ्वलय् पियानोय् ब्यांचुलि, सारंगीइ मालश्रीलिसें बासुरिइ थीथी नेवाः म्येँया धुन, नेवाः हुलाप्याखं, म्येँ आदि नं न्ह्यब्वःगु खः ।
ज्याझ्वःया दकलय् लिपांगु ब्वय् न्ह्यसः लिसः कासा नं जूगु खःसा विजयी जुयादीपिंत सिरपाः नं लःल्हायेगु ज्या जूगु खः । संस्थाया उपाध्यक्ष त्रिप्रसाद धौभडेलं सुभाय् देछनादीगु ज्याझ्वलय् समय्बजिलिसें क्वाति नं त्वनेगु ज्या जूगु खः । लुमंकेबहजू, थनच्वंपिं नेवाःतय्सं याना वयाच्वंगु थुकथंया ज्याझ्वःयात युनेस्कों तकं मान्यता बिया वयाच्वंगु दु ।
LEAVE YOUR COMMENTS