ने. सं. ११४४ कौलाथ्व पारू - नःलास्वनेगु

न्हवं क्वचाल तर वा धाःसा मवःनि

येँ -न्हापा न्हापा जूसा थ्व मौसमय् छक्वः वा वयाः मौसम ख्वाउँसे च्वनेधुंकल जुइ । तर थुगुसी धाःसा आः तक वा मवःनि । खास यानाः येँय् जनबहाःद्यःया न्हवं जुइबलय् फुल्ल जूसां वा वहे वइ धइगु पुलांपिं मनूतय् धापू दु । तर थुगुसी न्हवं क्वचायाः द्यःयात लंपुं छायेगु ज्या जुयाच्वंगु दु, वा धाःसा मवः । मौसमविद्तय् धापू कथं अझ मेगु छवाः तक नं वा वइगु सम्भावना मदुनि ।

मौसमविद् विभूति पोखरलं रासस–यात कनादी कथं पश्चिमया छुं थासय् फुल्ल वा वःगु खःसां मेथाय् धाःसा आः तक वा मवःनि । वंगु स्वला न्ह्यवंनिसें गनं हे वा वःगु मदुनि ।

वा वयेगु लागिं पश्चिम वायु सक्रिय जुयाः प्रयाप्त मात्राय् लःयागु हाः दुगु फय् वइगु जुइमाः । तर आः तक पश्चिम वायु सक्रिय मजूनिगु कारणं मौसमय् अज्याःगु दबाब लाःगु मदुनि । उकिं यानाः कमसेकम नं मेगु छवाः वा वइगु सम्भावना खने मदु ।

थ्व नं विश्वन्यंकं वयाच्वंगु जलवायु परिवर्तनया हे लिच्वः जुइमाःगु बिचाः मौसमविद्तय्सं तयेगु यानाच्वंगु दु । संसारया तापक्रम स्यना वनाच्वंगु कारणं माःबलय् वा मवइगु, म्वाःबलय् अप्वः वा वइगु जुयाच्वंगु दु ।

मेखे थ्व इलय् वा मवःगु कारणं यानाः चिकुलां जुइगु बुँ वालीयात नकारात्मक लिच्वः लाकूगु खँ पिहां वःगु दु । चिकुलां याइगु छ्व, तू व दुसिया वाली वा मवःगु कारणं यानाः सुख्खा जुयाच्वंगु दु । थथे जुल धाःसा उत्पादन समेत म्हो जुइफुगु खँ सम्बन्धित किसानतय्सं धाःगु दु ।
कृषिविज्ञतय्कथं थज्याःगु हिउँदे वालीया लागिं मंसिर व पुसपाखे वा वल धाःसा यक्व फाइदा जुइ । मखुुसा माघ तक वा वःसां राहत जुइ । यदि माघं नं वा मवल धाःसा थज्याःगु वालीया उत्पादन ७० प्रतिशत तक कम जुइफु गुकिं सम्बन्धित किसानतय्त तःधंगु नोक्सानी जू वनी ।