धर्नाकर्ता व प्रहरी दथुइ छझाः झडप, द्वलंद्वः मनूत धर्नाय् (लिसे‌ किपा)

येँ – सतक विस्तार पीडित संघर्ष समितिया आह्वानय् माइतिघर मण्डलाय् धर्ना बीगु झ्वलय् छझाः धर्नाकर्ता व प्रहरी दथुइ घ्वात्तुघ्वानाः झडप जूगु दु । धर्नाय् द्वलंद्वः मनूत थ्यनेवं माइतिघरया लँ पूवंक बन्द जूगु खः । लँ बन्द जुइवं प्रहरीया वाकिटकिइ धर्नाकर्तातय्त ख्याना छ्वयेत धयाहःगु तायेवं बन्दकर्तातय्सं प्रतिकार याःगु खः । थुबलय् प्रहरीलिसे छझाः घ्वात्तुघ्वानाः झडप जूगु खः ।

धर्नाय् द्वलंद्वः मनूत थ्यनेवं माइतिघर जुयाः वनेगु लँ पूवंक बन्द जुइधुंकूगु दु । थौंया धर्नाय् स्वनिगःया थीथी थासय् जुयाच्वंगु सतक विस्तारं पीडितपिलिसें उमित एक्यबद्धता क्यनाः स्वनिगःन्यंकंया मनूत माइतिघर मण्डलाय् मुंवयाच्वंगु दु ।

धर्नाय् नेवाः न्ह्यलुवा पद्मरत्न तुलाधरलिसें तीर्थराम डंगोल, हिरण्यलाल श्रेष्ठ व मेमेपिं यक्व हे नेवाः न्ह्यलुवा, कार्यकर्तातपिं थ्यनाच्वंगु दु ।
माइतघीर छचाःलिं जायेक मनूत मुनेधुंकूगु दु । धर्नाय् न्ह्यलुवाःपिं पद्मरत्न तुलाधर, तीर्थराम डंगोल, हिरण्यलाल श्रेष्ठ लिसें नेपाल टेलिकम कर्मचारी युनियनया रामप्रसादपिंसं न्ववानादीधुंकूगु दु । वय्कःपिंसं सडक विस्तारं पीडितपिं लिसे संघर्षया निंतिं ऐक्यबद्धता प्वंकादीगु खः ।

धर्नाय् स्वनिगःया थीथी थासय् जुयाच्वंगु सतक विस्तारं विस्थापित जुइमाःपिं पीडितलिसें स्वनिगःन्यंकंया मनूत थ्यनाच्वंगु दु । हरिसिद्धि, ख्वना, तोखा, कालिमाति, थानकोट लिसें थीथी थासय् सतक विस्तारं पीडितपिं ब्यानर, धिमे बाजं सहित धर्नाय् च्वनाच्वंगु खः । धर्नाय् ल्याय्म्ह ल्यासेत जक मखु, ज्याथजिथिपिं नं तःधंगु ल्याखय् थ्यनाच्वंगु दु । धर्ना थौं सुथय् १० बजे निसें १ बजे तक न्ह्याइगु खँ धाःगु दु ।