ओलीयात आक्रमण याःगुलिं येँया कार्यकर्ता आक्रोशित

येँ (नेपालभाषा टाइम्स)- नेकपा (एमाले) या अध्यक्ष केपी शर्मा ओलीयात म्हीग झापाय् पहिचानवादीतय्सं आक्रमण याःगु खँयात कयाः म्हिगः एमाले नेतातय् छगू पुचलं उपप्रधान लिसें गृहमन्त्री नारायणकाजी श्रेष्ठयात नापलानाः थःपिनि सरोकार क्यन ।

नेकपा (एमाले) येँ जिल्ला कमिटीया दुजःतय्सं म्हिगः उपप्रम श्रेष्ठयात नापलानाः पूर्व प्रधानमन्त्री एवं देय्या तःधंगु दलया अध्यक्षयात अथे आक्रमण जूगु खँय् गम्भीर चिउताः प्वंकूगु खः । एमाले नेता राजन भट्टराईया नेतृत्वय् वंगु उगु पुचलं म्हीग झापाय् जूगु उगु घटनां देय्या शान्ति सुरक्षा तसकं कमजोर जुयाच्वंगुया संकेत क्यंगु खँ धाःगु खः । एमाले नेतातय्सं थः अध्यक्ष ओलीयात याःगु आक्रमणबारे छानबिन यानाः दोषीयात कारवाही यायेमाः धकाः नं माग याःगु खः ।

म्हीग झापाया बुद्धबारी गाउँपालिकाय् प्रदेश नं. १ पुनः नामाकरण संयुक्त संघर्ष समितिया कार्यकर्तातय्सं हाकुगु ध्वाँय् क्यनाः विरोध याःगु खः । उगु इलय् छुं कार्यकर्तातय्सं ओलीया गाडीइ अप्पां कयेकाः आक्रमण समेत याःगु खःसा अप्पां कयेकेवं प्रहरीं हस्तक्षेप यानाः निम्ह प्रदर्शनकारीयात ज्वना यंकूगु खः । उकी लानाः छम्ह प्रहरीया छ्यं तज्याःगु खः । प्रदर्शनकारीतय्सं थःपिनि आन्दोलनय् घुसपैठ जूपिंसं ओलीयात अप्पां कयेकूगु खँ धाःगु दु ।

गृहमन्त्रीयात नापलानाः पिहां वयेगु झ्वलय् येँ मनपाया उपमेयर सुनिता डंगोलं येँया कपनय् छम्ह मिसायात स्याःगु च्यान्हु दयेधुंकलं नं आः तक ज्वने मफुनिगु खँय् चिउताः प्वंकादिल । सञ्चार माध्यमतलिसे खँ ल्हासें वय्कलं धयादिल, ‘अय् च्वंक विभत्स ढंगं मनू स्याना तलं नं प्रहरीं अपराधी पत्ता लगे याये मफु । आः ला सुं छम्ह मनू खन कि थः हे ग्यायेमाःगु अवस्था वयेधुंकल ।’
एमालेया उगु प्रतिनिधिमण्डलय् येँ मनपाया पुलांम्ह मेयर विद्यासुन्दर शाक्य लगायतया कार्यकर्तात दुगु खः । वय्कःपिंसं थः अध्यक्ष ओली विरुद्ध याःगु आक्रमणयात थःपिंसं अतिकं गम्भीर रुपं कयागु खँ धाःगु खः ।