पपुवा न्यूगिनियात नेपालं गुंगू विकेटं बुकल

किपू (नेपालभाषा टाइम्स)- नेपालं आइसिसी क्रिकेट विश्वकप लिग २ या थौं सोमवाः जूगु कासाय् पपुवा न्यूगिनियात याउँक बुकाः विश्वकप छनोट म्हितेगु लँय् छपलाः न्ह्याःवंगु दु ।

किपूया टियु क्रिकेट मैदानय् जूगु कासाय् नेपालं पिएनजीयात ९ विकेटं बुकूगु खः । नेपालं बिहीवाः जुइगु अन्तिम कासाय् युएइयात बुकेफत धाःसा विश्वकप छनोट म्हिते खनीगु जुइ । थ्व कासा त्यात धाःसा नेपालं लिगु टूया शीर्ष स्वंगू टिम दुने लानाः जिम्बावेय् जुइगु विश्वकप छनोट म्हितीगु जुइ ।

थौं जूगु कासाय् पिएनजीं टसय् बुइवं न्हापां ब्याटिङ याःवःगु खःसां नेपाःया बलरतय्सं घाटक बलिङ यासें वयात ९४ रनय् सीमित यानाबिउगु खः । लिसलय् ब्याटिङ याःगु नेपालं ७.४ ओभर म्हिताः छगू विकेटया क्षति विजय लक्ष्य चूलाकूगु खः ।

नेपाःया निंतिं आसिफ शेखं २१ बल म्हिताः च्यागू चौका व स्वंगू छक्का थ्वासें अविजित ५३ रन दयेकूगु खःसा कुशल भुर्तेलं ३३ रन दयेकल सा कुशल मल्लं अविजित १२ रन दयेकूगु खः ।

थौं सन्दीप लामिछाने चम्के जुइवं पिएनजी म्होचा रनय् सीमित जूगु खः । लामिछानें १० ओभरय् १ मेडन तयाः २५ रन जक बियाः न्यागू विकेट काःगु खः । अथेहे ललितनारायण राजवंशीं ७ ओभरय् १ मेडन तयाः १३ रन बियाः निगू विकेट काःगु खः । कुशल मल्लं ३ ओभरय् १ मेडन तयाः खुगू रन जक बियाः निगू विकेट कालसा सोमपाल कामिं ५ ओभरय् २ मेडन तयाः २२ रन खर्च यानाः १ विकेट काःगु खः ।