जसपा विवाद, सर्वोच्चया फैसला लिपा जक निर्णय
येँ – आः थवंथवय् विभाजित जुयाः हे न्ह्याः वनेगु धकाः मनस्थिति दयेकेधुंकूगु जनता समाजवादी पार्टी बारे निर्णय यायेगु लागिं निर्वाचन आयोगं थ्वहे वइगु साउन ३ गते निगुलिं पुचःयात थःगु ज्याकुथी सःतूगु दु ।
संसद विघटन सम्बन्धी फैसला सर्वोच्च अदालतं असार २८ गते बीगु धकाः धायेधुंकूगु दु । सर्वोच्चं संसद विघटन सम्बन्धी फैसला असार २८ गते बीगु धकाः धाःगु हे कारणं निर्वाचन आयोगं नं जसपा सम्बन्धी निर्णय साउन ३ गते जक यायेगु धकाः मिति क्वःछिउगु खँ सूत्रं धाःगु दु । निर्वाचन आयोगं सर्वोच्चया फैसला स्वयेधुंकाः जक जसपा सम्बन्धी निर्णय यायेगु मनस्थिति दयेकाः उकथं मिति बिउगु दावी नं सूत्रं याःगु दु ।
छुं जुयाः असार २८ गते संसद पुनस्र्थापना जुल धाःसा जसपाया विभाजन सम्बन्धी मुद्दा अझ हे जटिल जुइगु अनुमान जुयाच्वंगु दु । दल विभाजन सम्बन्धी संविधानया प्रावधान कथं दल विभाजन यानाः न्हूगु पार्टी दयेकेगु लागिं संसदीय दल व केन्द्रीय कार्यसमिति निगुलिं थासय् ४० प्रतिशत दुजःया हस्ताक्षर ज्वना वयेमाः । जसपाया निगुलिं खेमां थःपिंके बहुमत केन्द्रीय दुजः दु धइगु दावी यासें थःपिं हे आधिकारिक पार्टी खः धकाः माग यानाच्वंगु दु । तर संसद पुनस्र्थापना जुल धाःसा केन्द्रीय कार्यसमितिइ जक मखु संसदीय दलय् समेत ४० प्रतिशत दयेमाः । यदि मंत धाःसा उपिं सकलें स्वतन्त्र सांसदया हैसियतय् वनी ।
उपेन्द्र यादव पुचलं पार्टीया केन्द्रीय समितिइ थःगु बहुमत दु धकाः दावी याःसां संसदीय दलपाखे धाःसा महन्थ ठाकुर पुचःया बहुमत खने दयाच्वंगु दु । जसपाया ३२ म्ह सांसद मध्ये २० म्हेस्यां ओलीयात समर्थन यासें हस्ताक्षर बिया तयेधुंकूगु दु ।
थ्वहे समस्यां यानाः निर्वाचन आयोगं म्हीग छुं निर्णय याये मफुगु खः । थ्व समस्या समाधान यायेगु लागिं आयोगं प्रमुख निर्वाचन आयुक्त दिनेश थपलिया– या अध्यक्षताय् स्वम्ह दुजः दुगु छगू इजलास समेत गठन यायेधुंकूगु दु । साउन ३ गते निगुलिं पक्षया नेतातय्सं थःपिनि वकिल समेत ब्वना हयाः उगु इजलासय् वहस याइ । निर्वाचन आयोगय् थथे इजलास हे गठन यानाः पार्टी विभाजन सम्बन्धी फैसला यायेमाःगु तसकं दुर्लभ घटना खः धाःगु दु ।
LEAVE YOUR COMMENTS