सिंहदरवारय् फोहोर मुनेगु बन्द

येँ (नेपालाषा टाइम्स) येँ महानगरपालिकां सिंहदरबारया फोहोर म्हिगः निसें उठे मयात । महानगरपालिकाया ज्याय् सिंहदरबारं ग्वाहालि मयाः धासें येँ मनपाया मेयर बालेन साहं वंगु शुक्रवाः सिंहदरबारया फोहोर उठे मयायेगु घोषणा सामाजिक सञ्जालपाखें याःगु खः ।

उगु हे घोषणाया आधारय् सिंहदरबारय् च्वंगु फोहोर उठे मयाःगु खँ धाःगु दु । येँ मनपां वंगु शुक्रवाः सुकुम्बासी वस्ती चीकेत याःगु कुतःयात प्रहरीं ग्वाहालि मयाः धासें मेयर साहं आवंलि सिंहदरवारय् फोहोर उठे मयायेगु धकाः ख्याच्वः बियादीगु खः ।

लिसें वय्कलं सिंहदरवारय् च्वनीपिं नेतातय्त सिसडोलया ल्याण्डफिल साइटय् डम्प यायेमाःगु धकाः नं स्टाटस च्वयादीगु दु । थुकियात नं राजनीतिक ख्यलय् आलोचना जुयाच्वंगु दु । अथे हे मेयर साहं येँया थीथी सार्वजनिक थासय् तयातःगु प्रहरी बीट नं चीका छ्व धकाः पौ बिउगु दु । यदि मचीकल धाःसा थःपिंसं हे चीके माली धकाः ख्याच्वः नं बिउगु दु ।