संघीय समाजवादी फोरम थिमि नगरया भेला

थिमि- संघीय समाजवादी फोरम, नेपाल मध्यपुर थिमिया नगर भेला नगरसमितिया नायः सरोज घःजुया अध्यक्षताय् जुल । उगु भेलाय् मूपाहांकथं झायादीम्ह पार्टीया सहअध्यक्ष नापं सांसद राजेन्द्रप्रसाद श्रेष्ठं नेवाः प्रदेशय् पार्टी निर्माण व चुनौतिया बारे थःगु विचाः तयादीगु खः । वय्कलं सकलें कार्यकर्तात आन्दोलनय् कुहां वलकि जक नेता जुइ धासें पार्टीया गुगुं नं तहय् नेतात थः याकःचा वीर जुइत स्वल धाःसा उकिं पार्टीयात भिं याइमखु धयादिल ।

‘पार्टीयात सबल यायेत व एकतावद्ध यानाः न्ह्यःने यंकेत टीमवर्कया भावना दयेमाःगु आवश्यक दु’ सांसद श्रेष्ठं धयादिल, ‘नेपालय् आः पहिचानया आन्दोलनयात न्हूगु हे धंगं न्ह्यःने यंकेमाःगु आवश्यक जुइधुंकूगु दु ।’

नेपाःथेंज्याःगु बहुजातीय देशय् पहिचाना विनाया संघीयतायात संघीयता वल धकाः धायेगु सिजःयात लुँ तायेकेगु थें जक खः धयादिल । ‘संघीयता देय्या विकास, जनताया समृद्धि, प्रशासनिक सुगमता आदिया निंतिं नं आवश्यक जू, तर नेपाः थेंज्याःगु आन्तरिक औपनिवेशीकरणय् लानाच्वंगु देय्या निंतिं थ्व मूलतः उत्पीडित राष्ट्रियतातय् पहिचान व मुक्तिया निंतिं खः’ वय्कलं धयादिल ।

पार्टीया केन्द्रीय दुजःनापं प्रदेश नं. ३ या सहइन्चार्ज कृष्णबहादुर घःजुं नगरया स्थजानीय विकासय् सत्तारुढ दलतय्सं पक्षपात यानाच्वंगु धासें उकिया सामना यायेत पार्टी बल्लायेमाःगु व सशक्त रुपं न्ह्याः वनेमाः धयादिल ।

पार्टी जिल्ला उपाध्यक्ष जयकृष्ण दुवालं लसकुस यानादीगु भेलाय् जिल्ला अध्यक्ष दिना लामा, नेवाः प्रदेशया दुजः सुरेन्द्र प्रधान, नगर सचिव नानीछोरी वादे, संघीय समाजवादी महिला फोरमया उपाध्यक्ष शशी लिङ्देनया नं उपस्थिति दुगु खः ।

भेलां नगर समितिया न्हूगु नेतृत्व नं ल्यःगु खः । सरोज घःजुया हे अध्यक्षताय् न्हूगु नगर समितिया न्हूधाः याःगु खः । न्हूगु ज्यासना पुचलय् न्वकु तुइलमाया कालु, छ्यांजे नानीछोरी बादे, लिउछ्यांजे प्रतिक श्रेष्ठ, दांभरिं पूर्णभक्त बादे च्वनादीगु दुसा दुजलय् अमिता डंगोल, दिपा ढुंगाना, सुनिल घःजु, सानुकाजी कौरी, लक्ष्मीदेवी श्रेष्ठ व रजनी घिमिरेयात सर्वसम्मतिं ल्यःगु खः ।