लुसि लहिनाः विश्व रेकर्ड तयेगु ताः

धनुषा- जनकपुरया दिनेशसिंह यादवं ताःहाकःगु लुसि लहिनाः विश्वय् हे रेकर्ड तयेगु ताः तयादीगु दु । थुकिया लागिं वय्कलं वंगु झिदँ न्ह्यवंनिसें लुसि मचासे लहिनातःगु दु ।

वय्कलं थःगु ल्हातय् लहिनातःगु लुसि ७, ९ व १० इञ्ज जुजुं आः ४० इञ्च ताःहाकः जुइधुंकूगु दु । थपाय्–हाकः लुसि लहिनातयाम्ह थःहे नेपाःया न्हापांम्ह मनू जुयागु दावी नं वय्कलं यानादीगु दु । वय्कःयात थथे ताःहाकः लुसि लहीगु लागिं थौंकन्हय् अमेरिका व जापानय् च्वनाः ज्या यानाच्वंपिं जनकपुरया कनकपट्टीवासीतय्सं समेत ग्वाहालि यानाच्वंगु दु ।

ताःहाकःगु लुसि लहिनाः विश्व रेकर्ड तयेगु थःगु इच्छा दुसां थःत स्थानीय, प्रदेश व संघीय सरकारपाखें छुं हे कथंया ग्वाहालि मवःगु कारणं विदेशय् ज्या यानाच्वंपिं पासापिंपाखें ग्वाहालि कयाच्वनागु खँ नं वय्कलं कनादीगु दु । विदेशं वय्कःयात थौंकन्हय् लय् १५ द्वः तका ग्वाहालि वयाच्वंगु दु । विदेशय् ज्या यानाच्वंपिं पासापिंसं वय्कःयात वंगु प्यदँ न्ह्यवंनिसें ग्वाहालि याना वयाच्वंगु खँ वय्कलं कनादीगु दु ।

लुसि ताःहाकः जुयाः चिकुलां धाःसा थाकुइगु वय्कःया अनुभव दु । खास यानाः सिलः फायाः द्यनेबलय् लुसि बचे यायेत थाकुइगु खँ वय्कलं कनादिल । स्थानीय सरस्वती माध्यमिक विद्यालयय् लेखापाल पदय् ज्या याइम्ह यादवं लुसिया संरक्षण यायेत लय् न्यासः तका जक खर्च जुइगु व ल्यं दुगु ध्यबा बैंकय् मुंका तयागु जानकारी नं बियादीगु दु । भविष्यय् छ्यले माली धकाः मुंकातःगु थ्व ध्यबा आः प्यंगू लाख तका थ्यनेधुंकूगु दु । (रासस)

सम्बन्धित बुखँ

LEAVE YOUR COMMENTS