भारतय् कोरोना संक्रमणं सीपिनिगु ल्याः प्यंगू लाख पुल

एजेन्सी- भारतय् कोरोना संक्रमणया कारणं सीपिनिगु ल्याः प्यंगू लाख पुले धुंकूगु दु । भारतया स्वास्थ्य तथा परिवार कल्याण मन्त्रालयं शुक्रवाः बिउगु जानकारीकथं भारतय् कोरोनां सीपिनिगु ल्याः प्यंगू लाख व ३१२ म्ह थ्यंगु दु । बिहिवाः छन्हुया दुने जक कोरोना सीपिनिगु ल्याः ८५३ थ्यनेवं भारतय् कोरोना सीपिनिगु ल्याः प्यंगू लाख पूगु खः । बिहिवाः भारतय् थप ४६,६१७ म्हेकसिके संक्रमण खनेदुगु खः ।

भारतय् कोरोना संक्रमण आः बुलुहुं म्हो जुया वनाच्वंगु दु । कोरोनाया संक्रमण दरलिसें मृत्युदर नं म्हो जुयावनाच्वंगु दुसा मनूतय्गु रिकवरी रेट नं बांलाना वयाच्वंगु दु । भारतय् कोरोना संक्रमण जूपिनिगु ल्याः स्वंगू करोड प्यंगू लाख पुले धुंकूगु दुसा निगू करोड ९५ लाख म्ह संक्रमण मुक्त जुइधुंकूगु दु । भारतय् आः न्यागू लाख सक्रिय संक्रमितत दु ।

आः कोरोना नियन्त्रणय् वःसां विज्ञतय्सं मेगु लहर वयेफइगुलिं सतर्क जुयाच्वनेत धयाच्वंगु दु । थौंकन्हय् भारतय् कोरोना खोप बिइगु ज्या नं न्ह्यानाच्वंगु दु । भारतय् ३४ करोड ७६ द्वः मनूतय्सं खोप कायेधुंकूगु दु ।

सम्बन्धित बुखँ

LEAVE YOUR COMMENTS