आर्यघाटय् सी उइ दिकेमजिउ

सम्पादकजु,
झी नेवाःत न्हापांनिसें हे यानावयाच्वंगु परम्परा धकाः धाल धायेवं हीकेत ग्याः । छु जुइगु खm, गथे जुइगु खः धकाः मनय् शंका लुइके धुंकी । तर पशुपति विकास कोषया पदाधिकारी जुयाच्वंपिं मनूत धाःसा सलंसः दँ निसें न्ह्यानावयाच्वंगु आर्यघाटय् हे सी उइके बीमखु धाःगु न्यना । पशुपतिइ मन याउँकेत वइपिन्त कुं गइ हँ । पर्यटकतय्त शोभा मजुल हँ । थुमिगु न्ह्यपुइ सीगु, सिथं यंकेगु इलय् द्यः व घाटया व्यवस्था यानातःगु खँय् दुगु धार्मिक आस्था व विश्वासया भचा हे चिउताः मदुला? थुमिसं ला नेपाःयात हिन्दू राष्ट्र दयेके धकाः धयाच्वंगु नं राजनीति हे जक खनेदत ।

पशुपति महाद्यःया लिउने पूर्वपाखे कुहाँ वन धाःसा आर्यघाटय् थ्यनी, बागमती सिथय् थ्यनी । अन खुसि सिथय् घाट दयेकातःगु दु, ब्रह्मनाल व प्यकुंलाःगु तुंगः दु, अन सीम्ह उइगु याइ । आपाः सीम्ह ला वयां भचा दक्षिणपाखे वनेबलय् सतः न्ह्यःने च्वंगु निगः तुंगलय् उइगु याः । अनंलि अनं त्वाथःचा थहाँ वयाः बत्सला माई द्यः पुला वनाः हान. त्वाथः क्वय् झ्वःलिंक हे सी उइगु थाय् दु ।

झीथाय्या हिन्दू धर्मया मनूत सीत काशी वनेगु धकाः धाइ । न्ह्यागु खुसियात नं गंगा हे धकाः नं धायेगु चलन दुसां खास गंगा ला अन हे दुृ, अले अन काशी विश्वनाथया महाद्यः नं दु । अथे जूगुलिं मनू सीत अन वनीगु खः धाःसा झीथाय् नं मनू सीगु पक्का जुल धायेवं घाटय् हे यंकीगु पुलांगु चलन खः । म्होति नं क्वथाय् मखुसा छेलिइ तये हइ । आः अस्पतालया जमाना वःबलय् थुज्वःगु खँ ल्वः मनाः वन । पशुपतिया आर्यघाट वा न्ह्ववं घाट अथें दयेकातःगु मखु । न्हापायापिं मनूतय्गु आस्था व विश्वास कथं दयेकातःगु खः । थुकियात हे चीकेगु धाइगु ला अधम ज्या खः ।
रमेश राजभण्डारी, ताहाचः, येँ ।

सम्बन्धित बुखँ

LEAVE YOUR COMMENTS