संसद पुनर्स्थापना मखु आः चुनाव जुइ : ओली

येँ (नेपालभाषा टाइम्स) – नेकपा (ओली पक्ष) या अध्यक्ष लिसें प्रधानमन्त्री केपी ओलीं पार्टीयात छधी यायेगु नितिं अनेकौं त्याग यानाः नं मेगु पक्षं जालझेल जक यानाः पार्टी फुटया अवस्थाय् थ्यंकूगु द्वपं बियादीगु दु ।

येँय् थःगु पक्षीय सुदूरपश्चिम प्रदेशया  कार्यकर्ता भेलायात सम्बोधन यासें प्रम ओलीं धयादिल, ‘जिं शान्ति, स्थायित्व, संविधान व स्थिरताया निंतिं एकता यानागु खः । एकतायात ल्यंकेत जिं प्रचण्डलिसे पटक-पटक सहमति याना । प्रचण्डलिसे सहमतिया भ्वं जक छगः ब्रिफकेस जायेक दयेधुंकूगु दु तर वय्कलं सहमति कार्यान्वयन यानामदी ।’

प्रम ओलीं एकता यायेगु निंतिं पुलांगु माओवादी पक्षयात ४० प्रतिशत हिस्सा बियागु खँ कँसें उगु हे प्रतिशत बहुमतया कासाय् छ्यःगुलिं दुःख नं प्वंकादिल । प्रम ओलीं धयादिल, ‘पार्टी एकता यानाबलय् एमालेय् माधव नेपालया गुट दुगु खः, उकी प्रचण्ड गुट नं थपे जुइ धकाः जिं सिउ। तर एकताया नितिं जिं ४० प्रतिशत बिया । तर वय्कलं उगु शक्ति बहुमतया कासाय् यंकाः केन्द्रित यानादिल ।’

थम्हं तःक्वः हे प्रचण्डयात सम्झे यानागु खःसां वय्कलं जालझेल व तिकडम यानाच्वंगु द्वपं बिसें ओलीं धयादिल, ‘प्रचण्डया न्हापांनिसें पार्टी कब्जा यायेगु कथं हे एकता याःगु जुयाच्वन ।’ थः सीसां नं प्रचण्ड-माधव नेपालया आकांक्षा पूवंके मबीगु खँ धासें संसद पुनर्स्थापनाया सम्भावना मदुगु स्पष्ट यानादिल । वय्कलं धयादिल, ‘जि सीत तयार दु तर वय्कःपिनिगु आकांक्षा पूवंके बीमखु। चुनाव जुइ मखु धयादी, तर आः वइगु चुनावय्प त्तासाफ जुइ । आः चुनावया तयारी यानादिसँ ।’

प्रचण्ड माधव पक्षयात चुनावया तयारी यायेत नं वय्कलं सुझाव बियादिल । वय्कलं धयादिल, ‘माइतीघरय् ख्वाउँगु बँय् फ्यतुनाः रमिता क्यनादी मते, चुनावया तयारीइ लगे जुयादिसँ ।’

सम्बन्धित बुखँ

LEAVE YOUR COMMENTS